तनहुँ । साउन ३
मनसुन सक्रिय भएसँगै पृथ्वीराजमार्गको मुग्लिन–पोखरा खण्ड जोखिमपूर्ण बनेको छ । राजमार्ग स्तरोन्नतिका लागि भइरहेको कटान र लगातारको वर्षाका कारण तनहुँ खण्डका दर्जनौँ स्थानमा पहिरो खस्ने र ढुङ्गा खसिरहने जोखिम बढेको हो ।
जिल्ला प्रहरी कार्यालय तनहुँका सूचना अधिकारी प्रहरी नायब उपरीक्षक द्वारिकाप्रसाद घिमिरेका अनुसार मुसेखोला, घाँसीकुवा, छिर्कने, देउराली, विमलनगर, ढापटार लगायतका दर्जनौँ ठाउँमा पटक–पटक पहिरो खस्ने गरेको छ । आँबुखैरेनी–२, व्यास १२ को घाँसिकुवा लगायतको क्षेत्रमा लेदो पहिरो गईसकेको छ भने बिमलनगरको चुनपहरामा निकै ठुलो ढुङ्गा खसेको थियो । ति सबै अवरोधहरु हटाएरु सडक सञ्चालनमा ल्याइए पनि पानी पर्नासाथ पहिरो खसेर राजमार्ग जुनसुकै बेला अवरुद्ध हुन सक्ने अवस्था छ ।
राजमार्ग तथा तटीय क्षेत्रमा जोखिम बढेपछि जिल्ला प्रशासन कार्यालय तनहुँले उच्च सतर्कता अपनाउन सार्वजनिक अपिल जारी गरेको छ । प्रमुख जिल्ला अधिकारी शिवलाल तिवारीले सुरक्षा निकाय, सडकसम्बन्धी कार्यालय तथा स्थानीय तहलाई ‘हाइ अलर्ट’ (उच्च सतर्क) अवस्थामा राखिएको जानकारी दिए ।
‘राष्ट्रिय विपद् जोखिम न्यूनीकरण तथा व्यवस्थापन प्राधिकरण र जल तथा मौसम विज्ञान विभागको चेतावनी अनुसार मस्र्याङ्दी, सेती, मादी, त्रिशूली, कालीगण्डकी लगायतका नदीमा बहाव बढेको छ ।’ प्रजिअ तिवारीले भने ‘सडक र नदी किनारका नागरिक विशेष सतर्क रहन जरुरी छ । यात्रुहरूले सडकको अवस्था बुझेर मात्रै यात्रा सुरु गरून्, अन्यथा अत्यावश्यक कामबाहेक यात्रा नगर्न अनुरोध गरेका छौं ।’
प्रशासनले यात्राका क्रममा पहिरो वा विपद्को अवस्था आएमा तत्काल जिल्ला आपत्कालीन सञ्चालन केन्द्र वा नजिकको नेपाल प्रहरीको टोलीलाई सम्पर्क गर्न आग्रह गरेको छ । मुग्लिन–आँबुखैरेनी खण्डदेखि पोखरासम्मै सडक हिलाम्मे र भिरालो भएकाले यो वर्षायामभरि पृथ्वीराजमार्गको यात्रा चुनौतीपूर्ण बन्ने देखिएको छ ।
