तनहुँ । साउन ६
जिल्ला प्रहरी कार्यालय तनहुँ र मातहतका प्रहरी इकाईहरूले सञ्चालन गरेको ‘सर्च एण्ड स्विप’ अपरेसनका क्रममा ९ जना शंकास्पद व्यक्तिहरू नियन्त्रणमा परेका छन् ।
लागुऔषध नियन्त्रण, अवैध मदिरा बिक्री–वितरण, चोरी डकैती नियन्त्रण, फरार अभियुक्त पक्राउ तथा प्राकृतिक स्रोत साधनको अनधिकृत प्रयोग रोक्ने उद्देश्यले प्रहरीले विशेष अभियान चलाएको हो । सोही अभियानअन्तर्गत विभिन्न स्थानबाट ९ जनालाई नियन्त्रणमा लिइएको जिल्ला प्रहरी कार्यालय तनहुँले जनाएको छ ।
नियन्त्रणमा लिइएकामध्ये ३ जनालाई आवश्यक प्रारम्भिक सोधपुछ र अनुसन्धानपछि अभिभावक तथा आफन्तको जिम्मा लगाइएको छ भने बाँकी ६ जनामाथि गहन अनुसन्धान भइरहेको प्रहरीले जनाएको छ ।
जिल्लामा आपराधिक गतिविधि नियन्त्रण गर्न, शान्ति सुरक्षा कायम राख्न र गैरकानुनी काम रोक्नका लागि यस्ता लक्षित अपरेसनहरूलाई आगामी दिनमा पनि निरन्तरता दिइने जिल्ला प्रहरी कार्यालय तनहुँका सुचना अधिकारी तथा प्रहरी नायव उपरीक्षक (डिएसपी) द्वारिका प्रसाद घिमिरेले जानकारी दिए ।
