तनहुँ । साउन ७
तनहुँका भूमिहीन सुकुम्बासी र दलित परिवारले आउँदो साउन अन्तिम सातादेखि जग्गाको लालपुर्जा पाउने भएका छन् ।
तनहुँ क्षेत्र नम्बर २ का प्रतिनिधिसभा सदस्य श्रीराम न्यौपाने र भूमि व्यवस्था, सहकारी तथा गरिबी निवारण मन्त्री प्रतिभा रावलबीच विहिबार मन्त्रालयमा भएको छलफलका क्रममा साउन अन्तिम सातादेखि लालपुर्जा वितरण सुरु गर्ने तयारी भइरहेको जानकारी दिइएको हो ।
सांसद न्यौपानेले मन्त्री रावलसँग भेट गर्दै तनहुँस्थित भूमि प्रशासन तथा नापी कार्यालयबाट प्रदान गरिने सेवालाई थप चुस्त, दुरुस्त, पारदर्शी र प्रभावकारी बनाउन आवश्यक सहजीकरण गरिदिन अनुरोध गरेका छन् । भेटमा तनहुँका वर्षौँ पुराना भूमिगत तथा कानुनी समस्या समाधानबारे समेत गम्भीर छलफल भएको सांसद न्यौपानेले बताए ।
गुठी तथा बस्ती विकास जग्गा समस्याः गुठी जग्गाको दीर्घकालीन व्यवस्थापनका लागि ‘गुठी ऐन’ र मानिसहरू बसोबास गरिसकेका सार्वजनिक जग्गाको हकमा ’बस्ती विकास ऐन’मार्फत कानुनी निकास खोज्ने विषयमा छलफल भएको छ । उक्त समस्याको स्थायी समाधानका लागि पूर्वाधार विकास मन्त्रालय, भूमि व्यवस्था मन्त्रालय र कानुन मन्त्रालयबीच त्रिस्तरीय समन्वय र छलफल अगाडि बढाउने सकारात्मक समझदारी बनेको सांसद न्यौपानेले जानकारी दिए ।
अव्यवस्थित बसोबास र लालपुर्जाविहीन नागरिकको समस्या समाधान गर्दै भूमि प्रशासनलाई प्रविधिमैत्री र जनमुखी बनाउन आफ्नो निरन्तर पहल रहने सांसद न्यौपानेले बताए ।
