तनहुँ । साउन ७
तनहुँमा अवैध रूपमा प्राकृतिक स्रोत साधन (ढुङ्गा) उत्खनन तथा ओसारपसारमा संलग्न सवारी साधनहरूलाई नियन्त्रणमा लिई जरिवाना गराइएको छ ।
जिल्ला प्रहरी कार्यालय तनहुँका अनुसार साउन ७ गते खटिएको प्रहरी टोलीले अवैध रूपमा लोड गरिएको ढुङ्गासहित १ वटा ट्रयाक्टरलाई नियन्त्रणमा लिएको थियो। उक्त ट्रयाक्टरलाई आवश्यक कारबाहीका लागि व्यास नगरपालिकाको कार्यालय दमौली पठाइएकोमा नगरपालिकाले रु १२ हजार जरिवाना गराएको छ ।
यसैगरी, इलाका प्रहरी कार्यालय बेलचौताराबाट विभिन्न मितिमा खटिएको प्रहरी टोलीले अवैध ढुङ्गा उत्खननमा संलग्न स्केभेटर–१, जेसिबी–१ र ट्रयाक्टर–१ गरी ३ वटा सवारी साधन नियन्त्रणमा लिएको थियो । नियन्त्रणमा लिइएका ती सवारी साधनहरूलाई आवश्यक कारबाहीका लागि शुक्लागण्डकी नगरपालिकाको कार्यालय बेलचौतारा पठाइएको थियो ।
शुक्लागण्डकी नगरपालिकाले साउन ७ गते एकमुष्ट रु.६२ हजार जरिवाना गराएर सवारी साधनहरू छाडेको छ ।
प्रहरीका अनुसार व्यास र शुक्लागण्डकी नगरपालिका दुवै क्षेत्रबाट कुल रु.७४ हजार जरिवाना असुल गरी सवारी साधनहरू छाडिएको सूचना अधिकारी एवं प्रहरी नायव उपरीक्षक द्वारिका प्रसाद घिमिरेले जानकारी दिएका छन् ।
