तनहुँ । साउन ७
चालु आर्थिक वर्षको सुरुवातसँगै राष्ट्रिय परिचयपत्रको फोटो खिचाउने र कार्ड लिने सेवाग्राहीको अत्यधिक चाप बढेपछि जिल्ला प्रशासन कार्यालय तनहुँले सेवा प्रवाहको समय बढाएको छ । कार्यालयले एक सूचना जारी गर्दै आज साउन ८ गतेदेखि लागू हुने गरी बिहान ८ः०० बजेदेखि साँझ ६ः०० बजेसम्म सेवा दिने प्रबन्ध मिलाइएको जनाएको छ ।
टोकन प्रणालीमार्फत सेवा प्रदान गरिने भएकाले सेवाग्राहीहरूलाई आफ्नो पालोमा धैर्यतापूर्वक फोटो खिचाउन अनुरोध गरिएको छ । यसैगरी प्रशासन कार्यालयले परिचयपत्र नम्बर अप्रुभल फोटो खिचेपछि प्राप्त हुने राष्ट्रिय परिचयपत्र नम्बर विभागबाट भइरहेको ‘सिस्टम अपग्रेड’ का कारण केही ढिलाइ भइरहेको छ । उक्त नम्बर क्रमशः अप्रुभ हुँदै जाने भएकाले यस प्रयोजनका लागि जिल्ला प्रशासन कार्यालयमा धाइरहनु नपर्ने जनाइएको छ ।
कार्ड हराएका÷जलेका सेवाग्राही राष्ट्रिय परिचयपत्र कार्ड जलेको तर राष्ट्रिय परिचयपत्र नम्बर भने प्राप्त भइसकेका सेवाग्राहीहरूको सम्पूर्ण काम नम्बरबाटै हुने भएकाले केही दिनका लागि कार्यालयमा नधाउन आग्रह गरिएको छ ।
कार्यालयले साउन ७ गते बिहीबार सूचना प्रकाशित गरी सेवाग्राहीको चापलाई व्यवस्थित गर्न र सहज सेवा सुनिश्चित गर्न यो कदम चालिएको स्पष्ट पारेको छ ।
