तनहुँ । साउन २६
म्याग्दे गाउँपालिका–२ स्थित राधा माविका ६८० जना विद्यार्थीको सामूहिक दुर्घटना बीमा गरिएको छ । विद्यालयले आफ्ना विद्यार्थीहरूको सुरक्षा र उज्ज्वल भविष्यलाई ध्यानमा राख्दै सिद्धार्थ प्रिमियर इन्स्योरेन्ससँग दुर्घटना बीमा सम्झौता गरेको हो ।
‘हाम्रो सानो प्रयास, उज्ज्वल भविष्यका लागि ठूलो भरोसा’ भन्ने मूल नाराका साथ सञ्चालित योजना अन्तर्गत विद्यालयमा अध्ययनरत ६८० जना विद्यार्थीहरूलाई प्रतिव्यक्ति वार्षिक रु. १ लाख बराबरको सामूहिक दुर्घटना बीमा सुरक्षा प्रदान गरिएको विद्यालय व्यवस्थापन समितिका अध्यक्ष सन्दिप रानाभाटले बताए ।
विद्यार्थीलाई गुणस्तरीय शिक्षा प्रदान गर्नुका साथै उनीहरूको व्यक्तिगत सुरक्षा र अभिभावकप्रतिको जिम्मेवारीबोध गर्दै यो कार्यक्रम अघि बढाइएको विव्यस अध्यक्ष रानाभाटले बताए ।
