६ साउन, दमौली
पृथ्वीराजमार्ग अन्तर्गत मुग्लिङ देखी कोत्रेसम्मको तनहँुको खण्डमा पाँच ठाउँमा पहिरो खसेको छ । सोमबार बिहानदेखी लगातार परेको पानीको कारण पृथ्विराजमार्गको विभिन्न स्थानमा पहिरो जाँदा अहिले राजमार्ग अवरुद्ध छ ।
सो सडक खण्डको आवुखैरेनी गाउँपालिकाको ऐनापहरा, मार्किचोक, बन्दिपुर गाउँपालिकाको नयाँपुल र नाहाला तथा म्याग्दे गाउँपालिकाको गुणादीमा पहिरो गएको डिभिजन सडक कार्यालय दमौलीका सुचना अधिकारी इन्जिनियर सचिन श्रेष्ठले जानकारी दिए ।
त्यस मध्ये अन्य स्थानको पहिरो पन्छाईएको भएपनि ऐनापहरामा भने माथि अग्लो डाँडाबाट अहिले पनि लेदो बगिरहेको कारण पहिरो पन्छाउन नसकिएको इन्जिनियर श्रेष्ठले जानकारी दिए । पहिरो पन्छाउन गएको डोजर काम गर्न नसकेपछि त्यसै फर्किएको उनले जानकारी दिए । डाँडाबाट लेदो खस्न रोकिएपछि साँझ सम्म पहिरो पन्छाइसक्ने श्रेष्ठको भनाई छ ।
यसै गरि बन्दिपुर गाउँपालिका–१ को नाहामा करिब ४ मिटर सकड बाढीले बगाएको छ । सडक बगाउँदा ठुलो खाल्डो बनेको छ । उक्त स्थानमा डाइर्भसन राखिसकिएको इन्जिनियर श्रेष्ठले बताए । डाइभर्सनमा चिप्लो हुने हुँदा ग्राभेल हालेर यातयात सन्चालन गरिएको श्रेष्ठले बताए ।
यसैविच बाढि र पहिरोमा जिल्लामा दर्जन भन्दा धेरै घर बगाएको छ । सबैभन्दा धेरै क्षती बन्दिपुर गाउँपालिकामा भएको छ । उक्त गाउँपालिका ७ वटा घर पहिरोले बगाएको गाउँपालिकाका अध्यक्ष पुर्णसिंह थापाले बताए । पहिरोमा परि सोमबार २ जनाको मृत्यु भएको र मंगलबार मानवीय क्षती नभएको जिल्ला प्रहरी कार्यालयले जनाएको छ ।
