लोभी पापी नेताहरुले पार्टी छाडेपछि बल्ल सुधार भयोः केन्द्रीय सदस्य श्रेष्ठ
१० फागुन, देवघाट
नेपाल कम्युनिष्ट पार्टी (नेकपा) देवघाट गाउँ पालिका कमिटिको बैठक सोमबार देवघाटमा सम्पन्न भयो । सो बैठकलाई सम्बोधन गर्दै नेकपाका केन्द्रीय सदस्य एवं प्रतिनिधि सभाका निवर्तमान सांसद कृष्णकुमार श्रेष्ठ किसानले लोभी पापी नेताहरुले पार्टी छाडेर हिडेपछि बल्ल नेकपामा सुधार आएको बताए ।
नेताहरुले पहिला केपी शर्मा ओलीलाई प्रधानमन्त्री नै बन्न दिन नखोजेको, प्रधानमन्त्री बनेपछि विभिन्न बाधा र व्यवधान खडा गरेर असफल बनाउन खोजेको र अन्तिममा आएर आफ्नै पार्टीको सरकार ढाल्न अविश्वासको प्रस्ताव पेश गरेको श्रेष्ठले आरोप लगाए । सुकुम्बासी समस्या समाधान गर्न आयोज गठनमा अवरोध गरेको, संबैधानिक निकायका पदाधिकारी नियुक्त गर्न अवरोध गरेको र मन्त्रीपरिषदको पुर्नगठनमा समेत अवरोध गर्दै सरकारलाई अस्थिर बनाउन खोजेको श्रेष्ठले बताए ।
देवघाटको बर्षाैदेखीको समस्याको रुमपा रहेको अव्यवस्थित जग्गा सम्बन्धी समस्या अव चाँडै नै समाधान हुने केन्द्रीय सदस्य श्रेष्ठले दावी गरे । देवघाटलाई धार्मिक शहरको रुपमा विकसित गर्न आफुले शहरी विकास मन्त्री प्रभु शाह समक्ष प्रस्ताव राखेको भन्दै श्रेष्ठले मन्त्री शाहले त्यसमा सहमती जनाएको जानकारी दिए ।
नेकपा गाउँ कमिटिका सचिव केशवचन्द्र न्यौपानेको अध्यक्षतामा सम्पन्न सो कार्यक्रममा नेकपा जिल्ला सदस्य बाबुराम अधिकारी, देवघाट क्षेत्र विकास समितिका निवर्तमान अध्यक्ष शिवराज पौडेल, देवघाट गाउँपालिका वडा नम्बर ५ का अध्यक्ष यालबहादुर गुरुङ, वडा नम्बर २ का सचिव खड्क आले मगर लगायले मन्तव्य राखेका थिए । सो कार्यक्रमको सन्चालन भोजराज नैनावस्तीले गरेका थिए ।
सो कार्यक्रममा आगामी फागुन १५ गते पोखरामा आयोजना हुने गन्डकी प्रदेश स्तरीय जनसभालाई सफल पार्न देवघाटमा व्यापक प्रचार प्रसार गर्ने र धेरै भन्दा धेरै कार्यकर्ता र सुभेच्छुक परिचालन गर्ने निर्णय गरेको सचिव न्यौपानेले गरेका थिए । सो कार्यक्रममा जनसभा सफल पार्न १८ सदस्सीय समिति गठन गरिएको छ ।
