अन्जान परियार
घिरिङ, असार १९
घिरिङ गाउँपालिकाको समन्वयमा उर्भरा कृषि सहकारी संस्था लिमिटेडले कृषकलाई ५० प्रतिशत अनुदानमा प्रबिधि हस्तान्तरण गरेको छ । घिरिङ गाउँपालिकाले मकै उत्पादन बृद्दी गर्ने उदेश्यले मकै प्रबर्द्धन गर्ने कार्यक्रम अन्तर्गत तीन वटा पकेट क्षेत्र लाई अनुदान छुट्टाएको थियो । जस अन्तर्गत उर्भरा कृषि सहकारीका सदस्यहरुलाई सोमबार एक कार्यक्रम गरि प्रबिधी हस्तान्तरण गरेको हो ।
कृषकलाई आधुनिक किसिमको सामाग्रीहरु कम्बाइन मिल ९ वटा, मकै छोडाउने मिल ३ वटा, डिजिटल काँटा ३ वटा, बोरा सिलाउने मेसिन १ वटा, त्रीपाल २५० थान, मकैको बीउ १६५ किलो, कोदालो १ सय थान र १ सय थान बीउ भण्डारण बोरा बितरण गरेको हो ।
सहकारीका अध्यक्ष केशबराज पोख्रेलको अध्यक्षता भएको सो कार्यक्रममा गाउँपालिकाका अध्यक्ष होमबहादुर थापाले गाउँपालिकाले कृषिमा बिशेष जोड दिएर नीति तथा कार्यक्रम बनाएको बताउनु भयो । कृषकको उत्पादन लाई भण्डारण गर्नका लागि अत्रौलिमा शीत भण्डार बन्दै गरेको अध्यक्ष थापाले बताउनु भयो ।
कार्यक्रममा गाउँपालिकाकी उपाध्यक्ष राधादेवी अधिकारी तथा प्रमुख प्रशासकीय अधिकृत बिष्णुप्रसाद पोखरेलले पनि कृषकलाई प्रोत्साहन गर्न गाउँपालिका हरदम साथमा रहने ब्यक्त गर्दै सामानको सहि सदुपयोग गर्न अनुरोध गर्नु भयो । सो कार्यक्रम सन्चालन रामप्रसाद श्रेष्ठले गर्नु भएको थियो भने स्वागत मन्तव्य जिवलाल खनालले राख्नु भएको थियो ।
