भरतपुर, भदौ २२
धरान लगायत देशका विभिन्न स्थानमा भएको गाई हत्याको विरोध एवम् गोवंश रक्षार्थ नारायणी नदी किनारमा आगामी शनिबार विशाल धार्मिक सभा हुने भएको छ । उक्त धार्मिक सभाको लागि गोवंश रक्षार्थ गोवंश रक्षा अभियान–२०८० विशाल धार्मिक सभा आयोजक समिति गठन गरिएको छ ।
सभा आयोजनाकोलागि नेपाल सन्त समाजका अध्यक्ष स्वामी ज्ञानानन्द सरस्वती महाराजको संयोजकत्वमा १९५ सदस्यिय मुल आयोजक समिति बनाईएको छ । सभामा ॐ कार परिवार (बैदिक, बौद्ध, जैन, शिख, किराँत र प्रकृतिपुजक) हरुको सहभागिता रहने बताईएको छ ।
आयोजक समितिको निर्देशन मण्डलमा देवघाटधामका महामण्डलेश्वर स्वामी आत्मानन्द गिरी, स्वामी रमणानन्द गिरी, लंकुस्थित लक्ष्मी बैकुण्ठनाथ मन्दिरका महन्त आचार्य जगन्नाथ शर्मा र निम्बार्क दर्शन केन्द्र नेपालका केन्द्रीय अध्यक्ष प्राध्यापक हरिशरण आचार्य लगायतका सन्तहरु रहेका छन् ।
‘अनेकतामा एकता सनातन वैदिक हिन्दु धर्मको विशेषता, ओमकार परिवार (वैदिक, बौद्ध, जैन, शिख, किरात र प्रकृतिपूजक) एक होऔ । संविधानको पालना गराऔँ’ भन्ने नारा सहित धार्मिक सभा हुन लागेको श्री गण्डकी नारायणी संरक्षण महाआरती परिषद्का अध्यक्ष एवम् धार्मिक सभाको प्रचारप्रसार समितिका संयोजक प्रेमनिधी भारद्धाजले बताए ।
सभा अघि चितवनको विभिन्न चार वटा स्थानबाट र्याली निकालिने भएको छ । भरतपुरको चौबिसकोठी, नारयणगढको पोखरा बसर्पाक, नारयणगढको धर्मचोक र गैंडाकोटको भृकुटचोकबाट र्याली निस्एिर नारयणी किनारमा पुगी सभामा परिणत हुनेछ ।
उक्त सभामा सहभागी हुन विभिन्न धार्मिक संघ संस्थाले आह्वान गरेका छन् ।
