दमौली, कार्तिक २४
राष्ट्रिय प्रजातन्त्र पार्टी जिल्ला कार्य समिति तनहुँले पार्टीकी नेतृ तथा पुर्व मन्त्री दुर्गा श्रेष्ठलाई पार्टीको साधारण सदस्यबाट निष्कासन गर्ने निर्णय गरेको छ । राप्रपा तनहुँको शुक्रबार विहान बसेको बैठकले पार्टीको अनुशासन विपरित कार्य गरेको भन्दै केन्द्रीय सदस्य समेत रहेकी श्रेष्ठलाई साधारण सदस्यबाट निष्कासन गर्ने निर्णय गरेको राप्रपा तनहुँका अध्यक्ष बिनोद घर्तीले बताए । श्रेष्ठलाई थप कारवाहीकोलागि प्रदेश र केन्द्रीय नेतृत्व समक्ष सिफारिस गरिएको अध्यक्ष घर्तीले जानकारी दिए ।
व्यास नपा २ निवासी श्रेष्ठले स्थानीय, प्रदेश र संघको निर्वाचनमा पार्टीको उम्मेदबारलाई हराउनको लागि विपक्षी उम्मेदबारलाई भोट मागेको तथा जिल्ला र केन्द्रीय नेतृत्व प्रति लगातार नकारात्मक टिका टिप्पणी गरेको र अफवाह फैलाएको तथा कार्यकर्तालाई अन्य पार्टीमा आबद्ध हुन आग्रह गरेको आरोप लागेको अध्यक्ष घर्तीले जानकारी दिए ।
गत कार्तिक १८ गते आबुँखैरेनीमा पार्टीका केन्द्रीय उपाध्यक्षद्वय रविन्द्र मिश्र र हेमजंग गुरुङ तथा महामन्त्री डा.धवल शमशेर राणा उपस्थित रहेको कार्यक्रममा श्रेष्ठको अभद्र व्यवहारको कारण कार्यक्रममा कार्यकर्ता निराश भएको र श्रेष्ठबाट हुने क्रियाकलापले पार्टीको संगठन निर्माणमा अवरोध पुगिरहेको हुँदा श्रेष्ठलाई पार्टीको साधारण सदस्यबाट निष्कासन गर्ने निर्णय गर्दै थप अनुसन्धान गरि थप कारवाही गर्न केन्द्र र प्रदेश नेतृत्व समक्ष सिफारिस गरिएको राप्रपा तनहुँका अध्यक्ष बिनोद घर्तीले जानकारी दिए ।
