दमौली, असार २६
राष्ट्रिय विभुती आदिकवि भानुभक्त आचार्यको २११ औं जन्मजयन्तीको अवसरमा भानुभक्तको जन्मस्थल भानु नगरपालिकाको चुँदीरम्घामा विभिन्न कार्यक्रम गरिने भएको छ ।
ऋादिकवि भानुभक्त जन्मस्थल विकास समितिको आयोजनामा आज असार २७ गतेदेखी भानु जयन्तीको दिन असार २९ गतेसम्म विभिन्न कार्यक्रम गरिने समितिका कार्यकारी निर्देशक शंकर रानाभाटले बताए । आज असार २७ गते स्थानीय भानुभक्त प्रति श्रद्धासुमन व्यक्त गर्न मठ मन्दिरमा प्राथना र पुजा गरिने कार्यक्रम रहेको छ ।
त्यसैगरि असार २८ गते समितिको कार्यालय परिसरमा भानुभक्तीय रामायण वाचन, खुला कविता र विद्यालय स्तरीय खुला कविता प्रतियोगिता हुने भएको छ । सोही दिन अतिथी सत्कार तथा अतिथीहरुद्वारा कविता र गजल वाचन हुनेछ ।
यसैगरि भानु जयन्तीको दिन असार २९ गते विहान चुँदी रम्घामा बाजागाजा सहित समितिको कार्यालयबाट भानुको प्रतिमा स्थल रम्घासम्म प्रभातफेरी गरिने छ भने दिउँसो कार्यालय प्राङ्गणमा विभिन्न झाँकी प्रर्दशनी, कवि गोष्ठी, साहित्यिक तथा सांस्कृतिक कार्यक्रम एवं पुरस्कार वितरणको कार्यक्रम हुने कार्यकारी निर्देशक रानाभाटले बताए ।
असार २९ गते आयोजना हुने मुख्य कार्यक्रमको प्रमुख अतिथी राष्ट्रिय सभाको नेकपा एमाले दलको सचेतक भगवती न्यौपाने रहने रानाभाटले बताए । सोही दिन साँझ रम्घामा रहेको भानुको प्रतिमा स्थलमा दिपावली गर्ने कार्यक्रम पनि रहेको छ ।
भानु जयन्ती मनाउन चुँदी रम्घामा भारतका विभिन्न राज्यबाट र नेपालका विभिन्न जिल्लाबाट साहित्यकारहरुको जमघट सुरु भईसकेको कार्यकारी निर्देशक रानभाटले बताए ।
