दमौली, साउन १३
दमौली अस्पतालमा गत आर्थिक वर्षमा ९८ हजार ३५६ जनाले स्वास्थ्य उपचार सेवा लिएका छन् । गन्डकी प्रदेशका अस्पतालहरु मध्ये १०० शैयाको बाग्लुङको धौलागिरी अस्पताल पछि दमौली अस्पतालमा सबैभन्दा धेरै सेवाग्राहीले सेवा लिएका हुन् ।
अस्पतालका मेडिकल सुपेरिटेन्डेन्ट डा. परिवर्तन बरालका अनुसार अस्पतालमा आकस्मिक सेवा लिनेको संख्या १६ हजार ८०० रहेको छ भने भर्ना भएर उपचार गर्नेको संख्या १३६४ जना रहेको छ ।
त्यस्तै ३० हजार ६५३ को ल्याब परिक्षण गरिएको थियो । त्यसैगरि २ हजार ९५९ जनाले अप्रेसन सेवा तथा २९८ जनालाई प्रसुती सेवा दिईएको अस्पतालका प्रमुख डा. बरालले जानकारी दिए । गत आर्थिक वर्षमा दमौली अस्पतालमा डेंगु पोजेटिभ केस २३८६ जनाको उपचार गरिएको थियो ।
२०२८ सालमा स्थापना भएको सो अस्पताल २०५० प्राथमिक स्वास्थ्य केन्द्रको रुपमा सेवा सन्चालन गरिएको थियो । त्यस्तै २०५९ बाट १५ शैया अनुमति प्राप्त गरि सन्चालन गरिएकोमा हाल ३५ शैया आफै थप गरेर ५० शैया चलाएको डा. बरालले जानकारी दिए । अस्पतालमा हाल स्थायी, अस्थायी, करार र ज्यालादारीका गरि ११५ जना कर्मचारी रहेका छन् ।
उक्त अस्पताललाई भविष्यमा १०० शैया बनाउने तथा ब्लड बैंक सन्चालन, ट्रमा सेन्टर स्थापना, सर्पदंश उपचार केन्द्र सन्चालन तथा डायलासिस सेवा बिस्तार गरिने उद्देश्य रहेको डा. परिवर्तन बरालले जानकारी दिए ।
