दमौली, साउन २०
आँबुखैरेनी गाउँपालिका अन्तर्गत सन्चालित आँबुखैरेनी अस्पतालको नव–निर्मित अपरेशन थिएटरको सोमबार स्वास्थ्य तथा जनसंख्या मन्त्री प्रदिप पौडेलले उद्घाटन गर्ने भएका छन ।
संघीय तथा प्रदेशको स्वास्थ्य मन्त्रालयबाट विभिन्न उपकरणहरु जुटाई आबुँखैरेनी अस्पतालमा अपरेशन थिएटर सन्चालन गरिएको छ । गण्डकी प्रदेशको स्वास्थ्य आपूर्ति व्यवस्थापन केन्द्रको सहयोगमा शल्यक्रिया कक्षका लागि आवश्यक बत्ती, शैंया र इलेक्ट्रोकाउट्री मेसिन प्राप्त भएको थियो ।
लामो समयको प्रयासपश्चात अस्पतालमा शल्यक्रिया सेवा सुरु गरिएको आबुँखैरेनी गाउँपालिकाका अध्यक्ष शुक्र चुमानले बताए । अस्पतालमा शल्यक्रिया सुरु गर्ने लामो समयको प्रयासले अब सार्थकता पाएको अध्यक्ष चुमानले बताए । अस्पतालले प्रसूति, हर्निया, एपेन्डिक्स, हाइड्रोसिलको शल्यक्रिया सेवा सुरु गर्ने तयारी गरेको उनले जानकारी दिए ।
वि.सं २०७९ मंसिर १ गतेदेखि आँबुखैरेनी स्वास्थ्य चौकी स्तरोन्नती गरि आबुँखैरेनी अस्पतालको रुपमा सेवा सन्चालन गरिएको थियो ।, उक्त अस्पतालले आबुँखैरेनी गाउँपालिका मात्र नभएर तनहुँको बन्दीपुर, गोरखाको पालुङटार, सहिद लखन र चितवनको इच्छाकामना गाउँपालिकाका जनतालाई सेवा दिइरहेको छ ।
अस्पतालबाट चौबीसै घण्टा आकस्मिक सेवा, आधारभूत प्रयोगशाला, एक्सरे, भिडियो एक्सरे, इसिजी, फार्मेसीलगायत सेवा प्रवाह भइरहेको छ । अस्पतालमा एक जना एमडिजीपी, तीन जना मेडिकल अधिकृत र १३ नर्स कार्यरत छन् ।
आँबुखैरेनी अस्पताललाई थप आधुनिक र सुविधा सम्पन्न अस्पताल बनाउन निःशुल्क रुपमा सम्पुर्ण मेडिकल तथा स्वास्थ्य उपकरणहरु हस्तानतरण गर्ने छिम्केश्वरी अस्पतालका शेयर धनीहरुलाई सो अवसरमा सम्मान गनिरे कार्यक्रम समेत रहेको छ ।
गत साउन ६ गते नीजि क्षेत्रको छिम्केश्वरी अस्पताललाई आबुँखैरेनी अस्पतालमा समायोजन गर्ने सम्झौतामा हस्ताक्षर भएको थियो ।
