देवघाट, कार्तिक १३
देवघाट गाउँपालिका–५ देवपुरमा आगामी कार्तिक १४ गते बुधबार आठौं देवपुर सांस्कृतिक महोत्सव हुने भएको छ । देवघाट गाउँपालिकाको प्रमुख संरक्षकत्वमा तथा गाउँसुधार समिति देवपुरको आयोजनामा उक्त महोत्सव देवपुर चोक डवलीपार्कमा हुनेछ ।
महोत्सवबारे जानकारी दिन मंगलबार महोत्सव स्थलमा पत्रकार सम्मेलन आयोजना गरियो । पत्रकार सम्मेलनमा बोल्दै महोत्सवका मुल संयोजक एवं गाउँ सुधार समिति देवपुरका अध्यक्ष शुकु गुरुङले महोत्सवको माध्यमबाट स्थानीय संस्कृति संरक्षण र सम्बर्द्धन गराउने मुख्य उद्देश्य रहेको बताए । ‘लोक कला तथा संस्कृति संरक्षणमा हाम्रो अभियान’ भन्ने नारासहित आयोजना हुने महोत्सवलाई कालान्तरसम्म पनि निरन्तरता दिने उनले बताएका छन् ।
महोत्सवको देवघाट गाउँपालिकाका अध्यक्ष तिलबहादुर थापाले उद्घाटन गर्ने छन् । उक्त कार्यक्रममा लोकप्रिय गायक गायिका कुलेन्द्र विक, आशा विसी, अमर विरही गुरुङ, चन्द्रा गुरुङ, पृथ्वी गुरुङ तथा हास्यकलाकार बलराम सरकारको प्रस्तुती रहनेछ ।
उक्त अवसरमा देवघाट गाउँपालिका स्तरीय कौराहा प्रतियोगिता पनि आयोजना गरिने भएको छ । कौराहा प्रतियोगतामा प्रथम, द्वित्तिय, तृतिय र सान्त्वना हुने टिमलाई क्रमशः १५ हजार, १० हजार, ७ हजार र ५ हजार रुपैयाँ पुरस्कार दिईने संयोजक गुरुङले बताए । कौराहा प्रतियोगिताको टिम दर्ता निशुल्क रहेको गुरुङले बताए । महोत्सवमा ६ लाख खर्च हुने अनुमान गरिएको छ ।
उक्त कार्यक्रममा नचरी नाच, तामाङ सेलो, घाँटु, भजन लगायत विभिन्न जातजातीका सांस्कृतिक प्रस्तुती पनि प्रर्दशन गरिनेछ । कार्यक्रमको संयोजक आशिक राना तथा आर्थिक संयोजक प्रेम थापा रहेका छन् ।
पत्रकार सम्मेलनमा बोल्दै देवघाट गाउँपालिका उपाध्यक्ष भुवनसिंह गुरुङले देवपुर महोत्सव समग्र देवघाटको नै महोत्सव बन्दै गएको बताए । उनले यहाँ रहेका जातजातिका कला संस्कृति भेषभुषा संरक्षणका लागि यो महोत्सव निकै महत्वपूर्ण रहेको भन्दै यो महोत्सवले पछाडि परेका जातजातिको उत्थानका लागि सहयोग पु¥याउने विश्वास व्यक्त गरे ।
