देवघाट । साउन ८
संघीय मामिला तथा सामान्य प्रशासन मन्त्री भगवती न्यौपाने देवघाट आउने भएकी छिन् । मन्त्री भएपछि पहिलो पटक शुक्रबार गृह जिल्ला तनहुँ आउन लागेकी मन्त्री न्यौपानेले गृह जिल्ला भ्रमणको सुरुवात देवघाट गाउँपालिकाबाट गर्ने भएकी छिन् ।
मन्त्री न्यौपाने शुक्रबार दिउँसो देवघाट आईपुग्ने कार्यक्रम रहेको छ । मन्त्री न्यौपानेको देवघाट गाउँपालिकाको कार्यालयमा जनप्रतिनिधि र कर्मचारीसँग भेटघाटको कार्यक्रम रहेको छ । त्यसपछि सिटि हलमा नेकपा एमालेका कार्यकर्ता तथा स्थानीय नागरिक समाजसँग भेटघाट र छलफलको कार्यक्रम रहेको छ ।
नेकपा एमाले देवघाट गाउँ कमिटिका सचिव शान श्रेष्ठले मन्त्री न्यौपानेसँग भेटघाटको लागि शुक्रबार दिउँसो १ बजे देवघाटको सिटि हलमा सबै कार्यकर्ताहरुलाई आमन्त्रण गरिएको बताए ।
