देवघाट । बैशाख ५
नेकपा एमाले देवघाट गाउँ कमिटिले देवघाट वडा नम्बर ४ का सिङ्चाङगढीका ६० बर्षीय रेखबहादुर थापालाई उपचार सहयोग स्वरुप नगद २५ हजार रुपैयाँ सहयोग गरेको छ । तीनवर्ष देखि क्यान्सरसँग लडी रहेका रेखबहादुर आर्थिक अभावमा उपचार गर्न नसकी बसिरहेका छन् ।
उनको अवस्थाको बारेमा जानकारी पाएपछि पार्टीका कार्यकर्ताहरुले रकम संकलन गरि २५ हजार सहयोग उपलब्ध गराईएको नेकपा एमाले देवघाट गाउँ कमिटिका अध्यक्ष भिमबहादुर गुरुङले बताए । घाँटीको क्यान्सरको उपचारकोलागि आफुसँग भएको सबै सम्पत्ति सकिएको थापाले बताए । उक्त रोगको उपचारको लागि आफुले सम्पुर्ण सहयोगी दाताहरुलाइ सहयोग समेत अपिल गरेको उनले बताए ।
शनिबार एमालेका नेता तथा कार्यकर्ताहरु थापाको घरमै पुगेर उक्त रकम हस्तान्तरण गरेका थिए । नेकपा एमाले हरेक दुखी र पिडितहरुको घाउको मलम बनिरहेको र जहा दुख पर्छ त्यहा नेकपा एमालेले सहयोग गर्दै आएको अध्यक्ष गुरुङले बताए ।
