तनहुँ । बैशाख ३०
बन्दीपुर गाउँपालिका–१ मा ‘कपडा बैंक’ सञ्चालनमा आएको छ । उक्त कपडा बैंकको मंगलबार बन्दीपुर गाउँपालिकाका अध्यक्ष सुरेन्द्रबहादुर थापाले शुभारम्भ गरे । क्लोथ एन्ड फुड बैंक नेपाल सँगको सहकार्यमा सुरु गरिएको सो कार्यक्रम अन्तर्गत सोमबार कपडा बैंक उद्घाटन कार्यक्रमको अवसरमा ४४२ जना चेपाङ समुदाय तथा विपन्न परिवारलाई कपडा वितरण गरिएको थियो ।
वडा नम्बर १ को कार्यालय परिसरमा स्थापना गरिएको कपडा बैंकमा प्रयोगमा नआएका कपडा र झोला संकलन गरिनेछ । संकलित सामग्रीलाई रिसाइकल गरी पुनः प्रयोगयोग्य बनाएर आवश्यक पर्ने व्यक्तिलाई निःशुल्क उपलब्ध गराइने जनाइएको छ । साथै, बैंकले विपन्न समुदायसम्म घरघरमै पुगेर कपडा वितरण अभियान पनि सञ्चालन गरिरहेको छ ।
शुभारम्भ कार्यक्रममा गाउँपालिका अध्यक्ष सुरेन्द्रबहादुर थापाले आवश्यकतामा रहेका व्यक्तिलाई सहयोग गर्ने उद्देश्यले कपडा बैंक स्थापना गरिएको बताए । वडाध्यक्ष शिव कुमार श्रेष्ठले स्थानीयवासीलाई प्रयोगमा नआएका कपडा बैंकमा जम्मा गर्न आग्रह गरे ।
