समानतामा आधारित समाज निर्माण नभएसम्म संघर्ष जारीः सांसद न्यौपाने
२५ फागुन, देवघाट
१११ औं अन्तराष्ट्रिय महिला दिवसको अवसरमा सोमबार देवघाट गाउँपालिकाले विभिन्न कार्यक्रमको आयोजना गरेको छ । गाउँपालिकाले प्रवचन, जोडी दौड प्रतियोगिता, स्वस्थ दाँत प्रतियोगिता, बालविकास केन्द्रका सहजकर्ताहरुको प्रतिभा प्रदर्शनी कार्यक्रम लगायतका विभिन्न कार्यक्रमको आयोजना गरि अन्तराष्ट्रिय महिला दिवस मनाएको छ ।
सो कार्यक्रमको उद्घाटन गर्दै राष्ट्रिय सभाकी सदस्य भगवती न्यौपानेले समानतामा आधारित समाज निर्माण नभएसम्म महिलाहरुको संघर्षजारी नै रहने बताईन् । लामो संघर्ष र बलिदान पछि अहिलेको अधिकारहरु प्राप्त भएको भन्दै न्यौपानेले यी अधिकारहरु संरक्षण गर्दै अझ धेरै अधिकार प्राप्ती गर्नु पर्ने बताईन् । संविधानमा महिलालाई अंश र वंशको अधिकार प्राप्त भएपनि व्यवबहारिक रुपमा त्यो कार्यान्वयन हुन नसकेको न्यौपानेको भनाई छ । हिजोसम्म दोश्रो दर्जाको रुपमा हेरिने महिला आज राष्ट्रप्रमुख भएको भन्दै न्यौपानेले अव धेरै महिलाहरु त्यही बाटोमा हिड्नु पर्ने बताईन् ।
राजनीतिक आन्दोलनमा पुरुष सरह महिलाको योगदान रहेको तर पद लिने बेलामा सँधै पुरुषहरुले मात्रै लिने गरेको हुँदा अझै त्यस्तो पितृसत्तात्मक सोच र प्रबृत्तिको विरुद्ध संघर्ष गर्नुपर्ने सांद न्यौपानेको भनाई थियो । वालविकास केन्द्रका सहजकर्ताहरुको पारिश्रमिक अत्यन्त न्युन रहेको हुँदा उचित पारिश्रमिकको व्यवस्था गर्न संसदमा पटक पटक आवाज उठाएको र शिक्षामन्त्रीको ध्यानाकर्षण गराएको न्यौपानेले जानकारी दिईन् ।
सो कार्यक्रममा देवघाट गाउँपालिकाका अध्यक्ष दुर्गबहादुर थापा, उपाध्यक्ष विमला थापा, प्रमुख प्रशासकीय अधिकृत नरहरी सापकोटा लगायतले मन्तव्य राखेका थिए । कार्यक्रममा विभिन प्रतियोगिताका विजयीहरुलाई पुरस्कार समेत प्रदान गरिएको थियो ।