अन्जान परियार
दमौली, असार २७
तनहूँको घिरिङ गाउँपालिकाले एक हजार किलो भन्दा बढी अदुवा उत्पादन गर्ने कृषकलाई अनुदान बितरण गरेको छ । कृषि उत्पादनमा आधारित अनुदान कार्यक्रम अन्तर्गत एक हजार किलो भन्दा बढी अदुवा उत्पादन गर्ने किसानलाई प्रतिब्यक्ती ५ हजार रुपैयाँको दरले अनुदान बितरण गरेको हो ।
बुधबार आयोजित कार्यक्रममा गाउँपालिका अध्यक्ष होमबहादुर थापाले एक सय ४४ जना अदुवा कृषकलाई ७ लाख २० हजार रुपैयाँ बितरण गरे । सो अवसरमा थापाले घिरिङमा उत्पादित अदुवा विभिन्न जिल्लामा निर्यात गर्न सकिने बताए । उनले कृषकहरु निर्वाहमुखी भन्दा व्यवसायीक रुपमा खेतीमा लाग्नु पर्ने बताए ।
अध्यक्ष थापाले प्याज ५ सय किलो, लसुन २ सय ५० किलो र बेसार ५ सय किलो भन्दा बढी उत्पादन गर्ने लाई समेत ५ हजार नै अनुदान रहेको जानकारी गराए । यस्तै गाउँपालिकाले कृषकलाई कृषीमा प्रोत्साहन गर्न सो रकम दिएको अध्यक्ष थापाको भनाई थियो ।
सबै भन्दा बढी वडा नम्बर ५ का कृषकले सो अनुदान प्राप्त गरेका छन् । वडा नम्बर ५ मा ८९ जना, वडा नम्बर ४ मा २ जना, वडा नम्बर ३ मा ४७ जना र वडा नम्बर २ का ६ जना कृषकहरुले उक्त रकम प्राप्त गरेको कृषि शाखा प्राबिधिक सहायक समीक्षा ढकालले जानकारी दिइन् ।
कृषकहरूले उक्त अनुदान प्रदान गरेकोमा गाउँपालिकालाई धन्यवाद दिँदै खुसि ब्यक्त गरेका छन् । कार्यक्रममा गाउँपालिका उपाध्यक्ष राधा देवि अधिकारी, सुचना अधिकारी ध्रुव लामिछाने, कृषि शाखा प्रमुख रबि रामदाम, शिक्षा शाखा प्रमुख बाबुराम गैह्रे, गाउँपालिका अध्यक्षका स्वकिय सचिब राजकुमार थापाको उपस्थिति रहेको थियो ।
