दमौली, साउन १६
जिल्ला प्रशासन कार्यालय तनहुँले मंगलबारदेखी राष्ट्रिय परिचय पत्र वितरण कार्य सुरु गरेको छ । पहिलो चरणमा विवरण संकलन गरिएको ७ हजार थान परिचय पत्र वितरणकोलागि आएको र त्यसको वितरण कार्य सुरु गरिएको प्रमुख जिल्ला अधिकारी छविलाल रिजालले बताए । प्रमुख जिल्ला अधिकारी रिजालले मंगलबार पहिलो पटक घिरिङ गाउँपालिका–१ का सेवाग्राही उत्तम अधिकारीलाई राष्ट्रिय परिचय पत्र हस्तान्तरण गरि यसको वितरण कार्य सुरु गरेका हुन् ।
प्रजिअ रिजालका अनुसार राष्ट्रिय परिचयपत्र तथा पञ्जिकरण विभागले प्रिन्ट गरेर पठाएको ७ हजार थान परिचय पत्र सिष्टममा ‘इन्ट्री’ गरेर वितरण थालिएको हो । परिचय पत्र आएकोबारे प्रशासनले पहिले विवरण भर्दा उल्लेखित मोबाइल नम्बरमा राष्ट्रिय परिचय पत्र आएकोबारे जानकारी पठाउने गरेको छ ।
त्यसपछि परिचय पत्र लिनका विवरण संकलन गर्दा प्रशासन कार्यालयले दिएको एक प्रति कागज लिएर स्वयं उपस्थित हुनुपर्ने प्रजिअ रिजालले बताए । तनहुँमा नै राष्ट्रिय परिचय पत्रको फारम भरेर बायोमेट्रिक गरेका सेवाग्राहीको मात्रै तनहुँबाट वितरण गरिने प्रजिअ रिजालले बताए ।
