देवघाट, साउन १७
देवघाट गाउँपालिका–५ साँढेबगरका टकबहादुर गुरुङको घरबाट शुक्रबार विहान बरामद गरिएको झोला इलाका प्रहरी कार्यालय देवघाटका असई बोजनारयण श्रेष्ठले राखेको खुलेको छ । टकबहादुरका छोरा बुद्धसिंह गुरुङ एक महिना अघि बैदेशिक रोजगारीबाट घर फर्किएका थिए । असई श्रेष्ठले उनै बुद्धसिंहलाई मुद्धामा फसाउन उक्त झोला राखेको स्थानीय बासिन्दाले आरोप लगाएका छन् ।
प्रहरीले टकबहादुरको घर भित्र पसेर खानतलासी गर्दा केही सामान फेला नपरेपछि टकबहादुरको सौचालयको छानाबाट झोला बरामद गरेको थियो । सो झोला सौचालयको छानामा स्याउलाले छोपेर राखिएको थियो । प्रहरीले उक्त झोला त्यही नखोलेर प्रहरी चौकीमा लैजान खोज्दा गाउँलेहरुले घेराहालेर झोला खोलेर सामान देखाउन दवाव दिएका थिए । पछि उक्त झोला खोलेर हेर्दा गैंडाको खागको आकारको काठको टुक्रा भेटिएको थियो ।
इलाका प्रहरी कार्यालय देवघाटका असई श्रेष्ठले आफैले उक्त झोला सौचालयको छानामा राखेको स्थानीय भिम गुरुङले आरोप लगाए । असई श्रेष्ठ उक्त घर भित्र बाहिर आउने जाने गरेको आफुले देखेपछि उनको नियत ठिक नलागेर आफुले निगरानी गर्दा असई श्रेष्ठले सौचालयको छानामा झोला लुकाएको आफुले देखेको गुरुङले बताए ।
स्थानीय राजु गुरुङले असई श्रेष्ठले निर्दाेष व्यक्तिलाई फसाउनको लागि उक्त काम गरेको आरोप लगाए । इप्रका देवघाटका असई केही दिन अघि देखि उक्त स्थानमा आउ जाउ गर्दै आएका थिए । उनी बिनाबर्दीमा गाउँमा डुली दादागिरी शैलीमा हिडि गाउँलेहरुलाई त्रसित गराउँदै आएको स्थानीय ओम गुरुङलेले बताए ।
असई श्रेष्ठले उक्त झोला राखेको आरोपमा आक्रोसित स्थानीय बासिन्दाले प्रहरीको घेराबाट उनलाई थुतेर निर्घात कुटपिट समेत गरेका थिए । सो क्रममा उनलाई बचाउन प्रहरीले हवाई फायर गरेको थियो । इप्रका देवघाटका इन्चार्ज प्रहरी बरिष्ठ सई कृष्णबहादुर बानियाले असई श्रेष्ठले नै उक्त झोला राखेको स्थानीय बासिन्दाले आरोप लगाएको बताए । उनले यसबारेमा छानविन गरिने बताए ।
