दमौली, भदौ १८
तनहूँको म्याग्दे गाउँपालिकाले कक्षा ६ का विद्यार्थीलाई दिवा खाजाको व्यवस्थापन गर्ने भएको छ । गाउँ कार्यपालिकाको आईतबार बसेको बैठकले गाउँपालिका भत्रिका सम्पुर्ण सामुदायिक विद्यालयका कक्षा ६ का विद्यार्थीहरुलाई गाउँपालिकाको कोषबाट दिवा खाजाको व्यवस्थापन गर्ने निर्णय गरेको हो ।
संघिय सरकारले चालु आर्थिक वर्षमा कक्षा ६ का बिधार्थीलाई दिएको खाजा अनुदान रकम कटौती गरेको थियो । यसले कक्षा ६ का विद्यार्थीहरु मारमा परेका थिए । यसर्थ म्याग्दे गाउपालिकाले भदौ २१ गते देखि लागु हुने गरि गाउँ पालिकाभित्रका सामुदायिक बिधालयमा कक्षा ६ मा अध्ययनरत सम्पुर्ण छात्रछात्रालाई खाजा व्यावस्थापनका लागि पालिकाको आन्तरिक श्रोतबाट अनुदान उपलब्ध गराउने निर्णय गरेको प्रमुख प्रशासकीय अधिकृत जितबहादुर रानाले बताए ।
यो निर्णयसँंगै अबदेखि सामुदायिक बिधालयमा अध्ययनरत बालबिकास देखि कक्षा ६ सम्मका बालबालिकाले खाजा सुबिधा प्राप्त गर्ने भएका छन् । यसले सयौं विद्यार्थीहरु लाभान्वित हुनेछन् ।
