बलात्कार मुद्धामा मिलापत्र गराउन खोज्ने जनप्रतिनिधिलाई मुद्धा

Devghat Online

शेयर गरौ

दमौली, असोज १८

बलात्कार मुद्धामा मिलापत्र गराउन खोज्ने ऋषिङ गाउँपालिकाकी जनप्रतिनिधिलाई जिल्ला सरकारी वकिल कार्यालयले सह प्रतिबादीको रुपमा मुद्धा चलाएको छ ।

गत भदौ ३१ गते ऋषिङ गाउँपालिका–७ स्थित ज्यामिरेमाई आधारभुत विद्यालयका प्रअले सोही ठाउँकी ११ बर्षिया बालिकालाई बलात्कार गरेपछि सो बलात्कारको मुद्धा मिलाउन भुमिका खेलेकी ऋषिङ गाउँपालिका वडा नम्बर ७ की वडा सदस्य ५२ बर्षिया निलकुमारी थापालाई पनि प्रतिबादीको रुपमा कारवाही गर्न जिल्ला सरकारी वकिल कार्यालयले जिल्ला अदालतमा मुद्धा दर्ता गरेको छ ।

वडा सदस्य थापाले पीडित पक्षलाई २० हजार रुपैयाँ लिएर मिलापत्र गर्न दवाव दिएकी थिईन् । सरकारी वकिल कार्यालयले जनप्रतिनिधि भई सार्वजानिक पदमा बहाल रहेको अवस्थामा बलात्कारको घटना मिलापत्र गर्ने कार्यमा संलग्न रहेको भन्दै मुलुकी अपराध संहिता, २०७४ को दफा २२७. को उपदफा ३ बमोजिम थप सजायको माग गर्दै जिल्ला अदालतमा गत असोज २ गते मुद्धा दर्ता गरिएको छ । तर मुद्धा दर्ताको समयमा उनलाई फरार प्रतिबादि देखाईएको छ ।

उक्त मुद्धामा मिलापत्र गर्न दवाव दिने वडा सदस्य थापा सहित स्थानीय अकलादेवी आमा समुहकी अध्यक्ष दिलमाया थापा, सोही आमा समुहकी कोषाध्यक्ष धनीमाया थापा र स्थानीय नरबहादुर थापा समेतलाई प्रतिबादी बनाई मुद्धा दर्ता गरेको छ । उनीहरुलाई पनि फरार प्रतिबादी देखाईएको छ ।

आफ्नी छोरीलाई शिक्षक झुलबहादुर थापाले बलात्कार गरेको भनेर गाउँलेहरुसँग सहयोग माग्न गएकी पीडितकी आमालाई वडा सदस्य थापा र आमा समुहकी अध्यक्ष र कोषाध्यक्षले साउन ३२ गते पीडकको तर्फबाट २० हजार रुपैयाँ लिएर मिल्न र मुद्धा दर्ता नगर्न दवाव दिएका थिए ।

उक्त घटनाका आरोपितहरुलाई कारवाहीको माग गर्दै पीडितकी आमाले भदौ २ गते जिल्ला प्रहरी कार्यालयमा उजुरी दिएकी थिइन् । घटनापछि फरार रहेका मुख्य आरोपित थापालाई प्रहरीले भदौ ११ गते पक्राउ गरेको थियो भने मिलापत्र गर्न दवाव दिनेहरुलाई प्रहरी र सरकारी वकिल कार्यालयले फरारको सुचिमा राखेको छ ।

प्रतिक्रिया दिनुहोस्

सम्बन्धित समाचारहरू