दमौली, कार्तिक ९
जिल्ला ट्राफिक प्रहरी कार्यालय तनहुँले यात्रुसँग बढि भाडा लिने माईक्रोवसका चालक र सहचालकलाई कारवाही गरेको छ । शुक्रबार बिहान पोखराबाट काठमाडौं जाँदै गरेको बा ३ ख ६१६५ नम्बरको माईक्रो बसका चालक र सहचालकले प्रत्येक यात्रुबाट तोकिएको भाडा भन्दा २३५ रुपैयाँ बढि असुल गरेका थिए ।
माईक्रोमा पोखरा-काठमाडौंको भाडा प्रति यात्रु ७६५ रुपैयाँ तोकिएकोमा उक्त माईक्रोका चालक र सहचालकले प्रत्येक यात्रुसँग १ हजार भाडा लिएका थिए ।
यसबारेमा पीडित यात्रुले जिल्ला प्रहरी कार्यालय अगाडिको सडकमा ड्युटीमा खटिएका ट्राफिक प्रहरी जवान सुदिप ढकाललाई जानकारी गराएपछि उक्त माईक्रोका चालक र सहचालकलाई कारवाही स्वरुप हरेक यात्रुबाट असुल गरिएको तोकिएको भाडा भन्दा बढिको रकम २३५ रुपैयाँ सम्बन्धित यात्रुलाई नै फिर्ता गराईएको जिल्ला ट्राफिक प्रहरी कार्यालय तनहुँका प्रमुख राजिव विष्टले जानकारी दिए ।
पछिल्लो समय तनहुँ ट्राफिकले सवारी नियम उल्लंघन गर्ने सवारी चालक र सहचालकलाई कारवाही गर्ने अभियानलाई तिब्रता दिएको छ ।
कुनै पनि सवारीसाधन र चालकले सवारी नियम उल्लंघन गरेको भेटिए जुनसुकै माध्यमबाट ट्राफिक प्रहरीलाई जानकारी दिएमा उक्त सवारीसाधनको धनी, चालक र सहचालकलाई नियमअनुसारको कारवाही गरिने ट्राफिक प्रमुख प्रहरी बरिस्ठ नायव निरिक्षक विष्टले बताए । चाडपर्वको समयमा सार्वजनिक सवारीसाधनमा यात्रुहरु ठगिने क्रम बढ्ने हुदा यस्तो बेलामा ट्राफिक प्रहरी थप सचेत भएको विष्टले बताए ।
