दमौली, पुस १०
जिल्ला खेलकुँद विकास समितिको आयोजनामा मंगलबार सम्पन्न भएको तनहुँ जिल्ला स्तरीय १५ औं राष्ट्रपती रनिङसिल्ड प्रतियोगितामा व्यास नगरपालिका १५ स्वर्ण पदक सहित प्रथम भएको छ । सोमबारदेखी निर्मल मावि व्यास नपा १ विज्ञान चौरमा खेलाईएको प्रतियोगितामा व्यास नगरपालिकाले १ रजत र ९ कास्य पदक प्राप्त गरेको छ ।
प्रतियोगितामा ५ स्वर्ण, ३ रजत र २ कास्य पदक सहित शुक्लागन्डकी नगरपालिका दोश्रो र ३ रजत तथा १ कास्य सहित बन्दिपुर गाउँपालिका तेश्रो भएको जिल्ला खेलकुँद विकास समिति तनहुँका अध्यक्ष अनिल पाण्डेले जानकारी दिए ।
विभिन्न विधामा खेलाईएको प्रतियोगताको भलिवल तर्फको छात्र छात्रा दुबै प्रतियोगितामा शुक्लागन्डकी नगरपालिका प्रथम हुन सफल भयो भने भिमाद नगरपालिका छात्र छात्रा दुबै भलिवलमा दोश्रो हुन सफल भयो । त्यस्तै देवघाट गाउँपालिकाले छात्र तर्फ र आबुँखैरेनी गाउँपालिकाले छात्रा तर्फ तृतिय स्थान प्राप्त गर्न सफल भए ।
कबड्डीको छात्र तर्फको प्रतियोगितामा बन्दिपुर गाउँपालिका प्रथम, र व्यास नगरपालिका तृतिय हुन सफल भएका थिए । छात्रा कबड्डीमा भने व्यास नगरपालिका प्रमथ, म्याग्दे गाउँपालिका द्वित्तिय र भानु नगरपालिका तृतिय भएका थिए । यसैगरि एथलेटिक्स तर्फ व्यास नगरपाकिा प्रथम, शक्लागन्डकी नगरपालिका द्वित्तिय र म्याग्दे गाउँपालिका तृतिय भएको जिल्ला खेलकुँद विकास समितिका अध्यक्ष पाण्डेले बताए ।
उक्त प्रतियोगिताको सोमबार गन्डकी प्रदेशकी शिक्षा खेलकुँद तथा सामाजिक विकास मन्त्री शुशिला सिंखडाले उद्घाटन गरेकी थिइन् । प्रतियोगितामा जिल्लाका १० वटै स्थानीय तहका ७ सय भन्दा बढि विद्यार्थीहरुको सहभागिता रहेको थियो ।
पालिका स्तरमा आयोजित राष्ट्रपती रनिङसिल्ड प्रतियोगितामा उत्कृष्ट भएका विद्यार्थी नै जिल्ला स्तरको प्रतियोगितामा सहभागी भएका थिए । जिल्ला स्तरमा भएको प्रतियोगितामा उत्कृष्ट प्रतिभा देखाएका १५० जना खेलाडीहरु प्रदेश स्तरीय प्रतियोगितामा सहभागी हुन जाने अध्यक्ष पाण्डेले जानकारी दिए ।
प्रतियोगिताको समापनको अवसरमा समितिका अध्यक्ष अध्यक्ष पाण्डे सहित विभिन्न स्थानीय तहका शिक्षा तथा खेलकुँद शाखाका प्रमुखहरुले विजिय विद्यार्थीहरुलाई मेडल र प्रमाणपत्र प्रदान गरेका थिए ।
