देवघाट, पुस ११
मंगलबार सम्पन्न भएको तनहुँ जिल्ला स्तरीय राष्ट्रपति रनिङसिल्ड प्रतियोगिताको १५ अौं संस्करणमा देवघाट गाउँपालिकाले उल्लेख्य सफलता प्राप्त गरेको छ ।
हालसम्मका प्रतियोगितामा पदक विहिन हुँदै आएको देवघाट गाउँपालिकाले यसपटक विभिन्न विधामा ८ वटा पदक भित्र्याएको छ । जबकि ९ वटा बिधामा ३२ जना खेलाडी सहभागी भएको देवघाटले ८ पदक हात पारेको हो । त्यस्तै १६ खेलाडीले मेडल जितेका छन् । प्रतियोगितामा देवघाटले १ स्वर्ण, २ रजत र ५ कास्य पदक हात पारेको छ । देवघाटले छात्र भलिवलमा तृतीय स्थान हात पारेको छ । छात्रा तर्फको सटपुटमा परिमाया आलेले स्वर्णपदक हात पारिन् ।
यसअघि पदक विहिन हुँदै आएको देवघाटले यसपटक ८ वटा पदक जित्नुलाई ठुलो उपलब्धि मान्न सकिने देवघाट गाउँपालिकाका अध्यक्ष तिलबहादुर थापाले बताए । खेलकुँदको क्षेत्रमा गाउँपालिकाले गरेको लगानी र खेलाडी विद्यार्थीले गरेको मेहनेतको कारण यो सफलता प्राप्त भएको अध्यक्ष थापाले बताए ।
देवघाटले यसपटक खेलाडीको छनौट र व्यवस्थापन गर्ने जिम्मेवारी देवघाट युवा तथा खेलकुद विकास समितिलाई दिएको थियो । उक्त समितिले गाउँपालिका स्तरीय रनिङसिल्ड आयोजना गरि उत्कृष्ट खेलाडी छनौट गरेको थियो ।
खेलाडी विद्यार्थीलाई हौसला दिन खेल अवधिभर गाउँपालिकाका अध्यक्ष तिलबहादुर थापा मैदानमै रहे । त्यस्तै उपाध्यक्ष भुवनसिं गुरुङ र शिक्षा तथा खेलकुद शाखाका प्रमुख होमनाथ लामिछाने पनि खेलाडीलाई हौसला दिन खटिरहे । खेलकुद विकास समितिका अध्यक्ष अमर बहादुर फेवाली सहित समितिका पदाधिकारीहरु पनि खेलाडीको सफलताको लागि खटिरहेका थिए । सबैको प्रयत्न स्वरुप यसपटक राम्रो नतिजा आएको र आगामी वर्ष जिल्लामै प्रथम हुने गरि तयारी गर्ने देवघाट युवा तथा खेलकुद विकास समितिका अध्यक्ष अमर फेवाली मगरले बताए ।
देवघाट गाउपालिकाले यस बर्षको जिल्ला स्तरीय राष्ट्रपति रनिङ्शिल्ड खेलकुद प्रतियोगितामा उदाहरणीय सहभागिता र हालसम्मकै उत्कृष्ट खेल प्रदर्शन गरेको जिल्ला खेलकुद बिकास समिती तनहुँको अध्यक्ष अनिल पाण्डेले बताए ।
प्रदेश स्तरमा हुने राष्ट्रपति रनिङसिल्डमा खेलिने भलिवलको टिममा देवघाटबाट एक/एक जना छात्र छात्रा छनौट भएकाे जिल्ला भलिबल संघ तनहुँका अध्यक्ष पदम सुनारले जानकारी दिए ।
