देवघाट, पुस १८
राष्ट्रिय सभाका अध्यक्ष गणेशप्रसाद तिमिल्सेनाले देवघाटधामको धार्मिक तथा पर्यापर्यटनको विकास गर्न पहल गर्ने बताएका छन् । बुधबार विहान देवघाट गाउँपालिका–५ कालिमाटी स्थित जगन्नाथ शान्ति कुन्ज (बृद्धाश्रम) तथा भर्जन कालिका मन्दिरको अवलोकन गर्दै अध्यक्ष तिमिल्सेनाले देवघाट देशकै प्रमुख धार्मिक तथा पर्यापर्यटनकोलागि महत्वपुर्ण स्थान भएको हुँदा यसको विकास र प्रचार प्रसारकोलागि आफ्नो तर्फबाट सक्दो पहल गर्ने बताए ।
देवघाटको विकासकोलागि प्रधानमन्त्रीको तहमा पनि आफुले कुरा राख्ने अध्यक्ष तिमिल्सेनाले बताए । सो अवसरमा अध्यक्ष तिमिल्सेनालाई देवघाट गाउँपालिकाका अध्यक्ष तिलबहादुर थापा तथा उपाध्यक्ष भुवनसिंह गुरुङले देवघाटको विकासकोलागि संघीय सरकारले नै अपनत्व लिएर काम गर्नु पर्ने बताए । देवघाटमा धार्मिक पर्यटन र कृषिको प्रचुर सम्भावना रहेको हुँदा यी विषयमा संघीय सरकारले विशेष ध्यान दिनु पर्ने र देवघाट जोड्ने विभिन्न ठाउँमा मोटरेवल पुल निर्माणकोलागि बजेट विनियोजन गर्नु पर्ने बताएका थिए ।
सो अवसरमा गाउँपालिकाका अध्यक्ष थापाले जनस्तरबाट निर्मित भर्जन कालिका मन्दिरको आवश्यक निर्माणको कामको जिम्मेबारी गाउँपालिकाले लिने र बजेट विनियोजन गर्ने बताए ।
सो अवरसरमा नेकपा एमालेका नेता बिजय सुवेदी, नवराज ढकाल, नेकपा एमाले देवघाट गाउँ कमिटिका अध्यक्ष केशवचन्द्र न्यौपाने, देवघाट गाउँपालिकाका प्रमुख प्रशासकीय अधिकृत गौरीप्रसाद आचार्य, वडा नम्बर ५ का अध्यक्ष पुर्णबहादुर कुँवर, जगन्नाथ शान्ति कुन्जका अध्यक्ष शैलेन्द्र पिया, स्थानीय समाजसेवी बद्री मिश्रलगायतको उपस्थिती रहेको थियो ।
