काठमाडौं, असार १७
नेकपा एमालेका अध्यक्ष केपी शर्मा ओलीको नेतृत्वमा सरकार बनाउने तयारी भएको छ।
नेपाली काँग्रेसका सभापति तथा पूर्व प्रधानमन्त्री शेरबहादुर देउवाको प्रस्तावमा एमाले अध्यक्ष ओलीको नेतृत्वमा राष्ट्रिय सहमतिको सरकार बन्ने भएको हो।उच्च राजनीतिक स्रोतका अनुसार विकसित राजनीतिक घटनाक्रममा कुनै फेरबदल नआए यसै साता भित्र ओलीको नेतृत्वमा सरकार बनिसक्ने छ।
मुलुकमा विद्यमान संकटलाई संविधान संशोधन समेत गरेर समाधान गर्ने निष्कर्षसहित राष्ट्रिय सहमतिको सरकार बन्न लागेको हो । सकेसम्म माओवादी, रास्वपासहितको राष्ट्रिय सरकार बनाउने तयारी छ । उच्च स्रोतले भन्यो – माओवादी र रास्वपा आएनन् भने एमाले,काँग्रेस, जनमत, अशोक राई नेतृत्वको जसपा, लोसपासहितको सरकार बन्ने छ।
स्रोतका अनुसार काँग्रेस र एमालेबीच मन्त्रालयसमेतको सामान्य भागबण्डा भएको छ । माओवादी र रास्वपा नआएको अवस्थामा काँग्रेसले ११ र एमालेले १० मन्त्रालय लिनेछन् ।
प्रधानमन्त्री पुष्पकमल दाहाल प्रचण्ड र एमाले अध्यक्ष ओलीबीच सोमबार बिहान भएको भेटमा ओलीले दाहाललाई आफ्नो नेतृत्वमा राष्टिय सहमतिको सरकार बन्दा राजीनामा दिएर सरकार सहभागी हुन सुझाएका थिए ।
ओलीले विकासित राजनीतिक घटनाक्रमबारे जानकारी दिन आजै साँझ मन्त्रीहरुलाई आफ्नो निवास बाल्कोटमा बोलाएका छन् ।
