दमौली, असार २२
यसवर्ष बाढी र पहिरोबाट तनहुँ जिल्लामा ११ हजार जना प्रभावित हुने अनुमान गरिएको छ । जिल्ला विपद् व्यवस्थापन समितिले बाढी र पहिरोबाट ११ हजार जना प्रभावित हुने अनुमान गरि त्यसको सामना गर्न सबै जनशक्तिलाई उच्च सर्तकताका साथ परिचालन गर्ने निर्णय गरेको छ ।
तनहुँका १० स्थानीय तह मध्ये देवघाट र भिमादमा बाढीको उच्च जोखिम र अन्य पालिकामा पहिरोको उच्च जोखिम रहेको प्रमुख जिल्ला अधिकारी जनार्दन गौतमले बताए । विपद्बाट नागरिकलाई जोगाउन सबै स्थानीय तहलाई खोज, उद्धार र राहतकोलागि तयारी अवस्थामा रहन अनुरोध गरिएको प्रजिअ गौतमले बताए ।
बाढि र पहिरो गएमा उद्धारको लागि औजारको कमी भएपनि जनशक्ति भने पर्याप्त रहेको प्रजिअ गौतमले बताए । नेपाली सेनाको ३ वटा गण, शसस्त्र प्रहरीको १ वटा गण तथा नेपाल प्रहरीको विशेष सुरक्षा गढन समेत तनहुँमा रहेको हुँदा उद्धारकोलागि जनशक्तिको अभाव नहुने प्रजिअ गौतमले बताए ।
