देवघाट, असार २५
देवघाट गाउँपालिका–५ को घिनटार–टाउनचोक–देवपुर सडकमा वर्षा सुरु भएपछि कालोपत्रे सुरु गरिएको छ । असार अन्तिममा वर्षायाम सुरु भएपछि कालोपत्रे गर्न सुरु गरेपछि सडकमा खन्याईएको बिटुमिन (अलकत्रा) बगाएको छ ।
निर्माण कम्पनीले सडकमा कालोपत्र गर्नको लागि बिटुमिन विच्छ्याएको छ । उक्त सडक कालोपत्रे गर्ने काम अलपत्र पारी निर्माण व्यवसायी वेपत्ता भएको बारेमा गत जेठ २१ गते सोमबार देवघाट अनलाइनमा समाचार प्रकाशित भएको थियो । सो समाचार प्रकाशित भएपछि निर्माण कम्पनी सम्पर्कमा आई कालोपत्रेको काम सुरु गरेको थियो ।
अहिले वर्षायाम सुरु भईसकेको र लगातार पानी परिरहँदा कालोपत्रे गर्दा गुणस्तरीय नहुने भन्दै स्थानीयले आलोचना गरेका छन् । १५ सय मिटर लम्बाई र नाली सहित ११ मिटर चौडाईको उक्त सडक २०८० पुस २१ गतेसम्म नाली निर्माण र कालोपत्रे गर्ने गरि जिएमआर कन्ट्रक्स नेपाल प्रा.लिसँग २०७९ पुस ११ गते सम्झौता भएको थियो ।
उक्त सडक कालोपत्रेको लागि भ्याट रकम सहित ३ करोड ७१ लाख ११ लाख २२५ रुपैयाँमा निर्माण कम्पनीमा सम्झौता भएको थियो । कालोपत्रे गर्न गाउँपालिकाले निर्माण कम्पनीलाई अन्तिम पटक असार मसान्तसम्म म्याद दिएको थियो । तश्विरः सफल शर्मा
