दमौली, साउन ३
राष्ट्रिय युवा संघ नेपाल भानु नगर कमिटिले नगरपालिकाबाट निलम्बित ६ जना प्राविधिक कर्मचारीलाई तत्काल पुनर्वाहाली गर्न माग गरेको छ । संघले विहिबार भानु नगरपालिकाका प्रमुख आनन्दराज त्रिपाठीलाई ज्ञापनपत्र बुझाउँदै नगरपालिकाले हटाएका कर्मचारीलाई पुनर्वाहाली गर्न माग गरेको हो ।
भानु नगरपालिकाको हालै सम्पन्न १४ औं नगर सभाले कर्मठ र ईमान्दार कर्मचारीहरुलाई बिना जानकारी निलम्वन गरेको कुराले युवा संघलाई गम्भिर बनाएको भन्दै ज्ञापनपत्रमा नगर प्रमुखको व्यक्तिगत पूर्वाग्रहको आधारमा ति करारमा रहेको कर्मचारीहरुलाई निलम्बन गर्नु न्याय संगत नभएको ठहर गरिएको छ ।
यसैगरि युवा संघले नगरपालिकाका प्रमुख, उप–प्रमुख तथा अन्य जनप्रतिनिधीले प्रयोग गरेको ईन्धनको विवरण सार्वजनिक गर्न माग गरेको छ । अख्तियार दुरुपयोग अनुसन्धान आयोगको हालसम्मका प्रतिवेदनहरु सार्वजनिक गर्नुपर्ने, नगरपालिकाका सवारी साधन प्रयोग गर्ने व्यक्ति तथा सवारी साधनको विवरण सार्वजनिक गर्नुपर्ने तथा नगरपालिकामा कार्यरत कर्मचारीको दरबन्दी संख्या हाल कार्यरत कार्मचारीको संख्या सार्वजनिक गर्नुपर्ने माग गरिएको छ ।
यसैगरि आर्थिक वर्ष २०८०÷८१ को यथार्थ आयव्याय सार्वजनिक गर्नुपर्ने, नगरपालिकाबाट सन्चालित जेसिभीको प्रयोग विवरण सार्वजानिक गर्न पनि युवा संघले माग गरेको छ ।
राष्ट्रिय युवा संघ, नेपाल भानु नगर कमिटिका अध्यक्ष सोम बहादुर तामाङले हस्ताक्षर गरेको उक्त ज्ञापनपत्रमा उक्त मागहरु यथासिघ्र सम्बोधन नभए चरणबद्ध आन्दोलन गर्ने चेतावनी दिईएको छ ।
