देवघाट, साउन ६
हरेक वर्ष साउनको सोमबार मनाउँदै आइरहेको बोलबम मेला भोली सोमबारबाट देवघाटमा सुरु हुने भएको छ । बोलवम मेला साउन महिनाको प्रत्येक सोमबार मनाइन्छ । बोलवम मेलाको लागि प्रत्येक सोमबार देवघाटमा हजारौं भक्तजन आउँछन् ।
यस वर्ष त्रिशुली र कालिगन्डकी नदीको बहाव बढेको हुँदा मेलामा स्नान गर्न आउने भक्तजनको सुरक्षाको लागि तनहुँ र चितवन तर्फ सुरक्षा सतर्कता बढाइएको देवघाट क्षेत्र विकास समितिका कार्यकारी निर्देशक सदन बरालले बताए ।
सोमबारको मेलाको लागि आइतबार राती देखी नै भक्तजन आउने हुँदा नदि किनारमा बिजुली बत्तिको प्रबन्ध गर्ने, नदीमा स्नान गर्ने भक्तजनको सुरक्षाको लागि डोरी सहितको दुई वटा डुङ्गाको व्यवस्थापन गरिएको कार्यकारी निर्देशक बरालले बताए ।
मेलामा आउने भक्तजनको सुरक्षाकोलागि साउन महिना भर इलाका प्रहरी कार्यालय देवघाट मार्फत सुरक्षा व्यवस्था प्रभावकारी बनाईएको छ ।
यस वर्ष साउन महिनामा ४ वटा सोमबार परेको हुँदा उक्त चारै दिन ५० हजार भन्दा बढि भक्तजन मेला भर्न आउने अपेक्षा गरिएको छ । त्यसबाहेक साउनका अन्य बारमा पनि देवघाटमा दैनिक हजारौंको संख्यामा भक्तजन आउने छन् । गत वर्ष मलमास परेकोको कारण बोलवम मेला नभएको कारण यसवर्षको बोलवम मेलामा भक्तजनको संख्या विगतको भन्दा बढ्न सक्ने अपेक्षा क्षेत्र विकास समितिले लिएको छ ।
चितवन, तनहुँ र नवलपुरको सङगमस्थल देवघाटमा साउनको सोमबार हरेक वर्ष उत्सवका रुपमा मनाइने बोलबम मेलामा देश बिदेशबाट हजारौं भक्तजन आउने गर्छन् । साउने सोमबार देवघाटको पवित्र जल र बेलपत्रले शिवको पूजाआराधना गरे मनोकामना पूरा हुने धार्मिक विश्वास रहेको देवघाट क्षेत्र विकास समितिका पुर्व अध्यक्ष शिवराज पौडेलले बताए । साउनको हरेक सोमबार निराहार व्रत बसी बिहान सबेरै स्नान गर्ने धार्मिक मान्यता छ ।