दमौली, साउन १६
मिलेनियम च्यालेन्ज एकाउन्ट (एमसीए) नेपालले ४०० केभी न्यू दमौली सबस्टेसन निर्माणका लागि भारतको टेक्नो इलेक्ट्रिक एण्ड इन्जिनियरिङ कम्पनीसँग सम्झौता गरेको छ । बुधबार आयोजित कार्यक्रममा एमसीए–नेपालका कार्यकारी निर्देशक खड्गबहादुर विष्ट र टेक्नो कम्पनीका व्यापार निर्देशक राजीव अग्रवालले सम्झौतापत्रमा हस्ताक्षर गरेका हुन् ।
एमसिसि परियोजना अन्तर्गतको नयाँ दमौली सबस्टेशनको ३८.८९ मिलियन डलरको सम्झौतामा हस्ताक्षर भएको हो । यो सँगै मिलिनियम च्यालेन्ज कर्पोरेसन (एमसीसी) नेपाल कम्प्याक्ट अन्तर्गत निर्माण हुने ३ वटै सबस्टेसनको निर्माण सम्झौता भएको हो ।
न्यू दमौली सबस्टेसनको क्षमता एक हजार मेगाभोल्ट एम्पिएर हुनेछ । निर्माण सकिएपछि न्यू दमौली देशकै ठूलो सबस्टेसन हुने एमसीए नेपालले जनाएको छ । न्यू दमौली सबस्टेसनले रातामाटे, लेखनाथ र न्यू बुटवल सबस्टेसनसँग विद्युत् प्रवाहको लागि महत्वपूर्ण विन्दुको रुपमा काम गर्नेछ ।
सम्झौतापत्रमा हस्ताक्षर कार्यक्रममा ऊर्जामन्त्री दीपक खड्काले नेपालमा विद्युत् वितरण प्रणाली सुदृढ गर्न यी सबस्टेसनहरुले महत्वपूर्ण योगदान पु¥याउने बताए । साथै आयोजना समयमै सम्पन्न गर्नका लागि सरोकारवाला सबैलाई पहल गर्न समेत उनले आग्रह गरे ।
अर्थ मन्त्रालयका सचिव तथा एमसीए–नेपाल बोर्डका अध्यक्ष रामप्रसाद घिमिरेले एमसीसी नेपाल कम्प्याक्ट कार्यान्वयन गर्न एमसीए–नेपालको निरन्तर प्रयासले राम्रो संकेत दिएको बताए । नेपालको बढ्दो ऊर्जा क्षेत्रका लागि तीनवटा सबस्टेसनहरू आवश्यक रहेको बताउँदै सचिव घिमिरेले नेपालको आर्थिक वृद्धिका लागि औद्योगिक र व्यावसायिक गतिविधिहरू बढाउन भरपर्दो ऊर्जा क्षेत्र सुनिश्चित गर्न मद्दत पुग्ने बताए ।
कार्यक्रममा अमेरिकी राजदूत डिन.आर थम्प्सनले समावेशी एवं दिगो आर्थिक विकासमार्फत नेपालको हरेक घरमा ऊर्जा पु¥याउन, नेपाली अर्थतन्त्रलाई थप ऊर्जा दिन, रोजगारी सिर्जना गर्न र गरिबी न्यूनीकरण गर्न नेपालसँग सहकार्य गर्दै एमसीसी नेपाल कम्प्याक्ट साझा सफलताको कथाको महत्वपूर्ण अंग बन्ने क्रममा रहेको बताए ।
एमसीए–नेपालका कार्यकारी निर्देशक विष्टले एमसीसी नेपाल कम्प्याक्ट कार्यान्वयनमा आएको एक वर्षमा तीनैवटै सबस्टेसन निर्माणसम्बन्धी सम्झौता हुनु कोसेढुंगा साबित भएको बताए ।
एमसीसी नेपाल कम्प्याक्टले तीनवटा सबस्टेसनसँगै विद्युत् प्रसारण आयोजनाअन्तर्गत काठमाडौंको लप्सीफेदीदेखि नवलपरासी (बर्दघाट सुस्ता पश्चिम) स्थित नेपाल–भारत सीमानासम्म तीन सय १५ किलोमिटर प्रसारण लाइन निर्माण गर्न लगानी गर्नेछ ।
एमसीए नेपालका अनुसार न्यू बुटवल–गोरखपुर १८ किलोमिटर अन्तदेशीय प्रसारणलाइन निर्माणका लागि प्राप्त बोलपत्रहरूको मूल्यांकन भइरहेको छ । एमसीए–नेपालले यसको निर्माण सम्झौता आगामी अगस्टभित्र गर्ने लक्ष्य लिएको छ । बाँकी २९७ किमि प्रसारणलाइन निर्माणका लागि यथाशीघ्र यसै वर्ष पुनः बोलपत्र आहृवान गर्ने तयारी भइरहेको एमसीए नेपालले जनाएको छ ।
चार सय केभी रातामाटे सबस्टेसनबाट विभिन्न जलविद्युत् आयोजनाबाट उत्पादन हुने करिब ३२०० मेगावाट बिजुली प्रसारण गर्ने क्षमता हुनेछ । यस सबस्टेसनमा विभिन्न भोल्टेजस्तरमा उपलब्ध हुने भरपर्दो बिजुली वितरणले नेपालमा औद्योगिक र व्यावसायिक गतिविधि बढाउन सकिनेछ ।
गत वैशाखमा एमसीए नेपालले नवलपरासी (बर्दघाट सुस्ता पश्चिम) जिल्लामा ४०० केभी नयाँ बुटवल सबस्टेसन निर्माणका लागि लिंकसन इन्डिया प्रालिसँग सम्झौता गरेको थियो । उक्त सबस्टेसनको निर्माण सम्झौता अवधिको ३९ महिनाभित्र सम्पन्न गर्नुपर्ने एमसीए–नेपालले जनाएको छ ।
