देवघाट, भदौ २९
देवघाट गाउँपालिकामा स्नातक क्याम्पस खोल्ने विषयमा सबै सरोकारवालाहरु सकारात्मक रहेको क्याम्पस स्थापना सम्बन्धी सम्भाव्यता अध्ययन समितिका संयोजक डा.सुरेन्द्रप्रसाद श्रेष्ठले बताए ।
सबैको सहयोगमा देवघाटमा छिटै अब क्याम्पस खोल्ने सकिने सम्भावना देखिएको डा.श्रेष्ठले बताए । देवघाट गाउँपालिकाभर एउटा पनि स्नातक क्याम्पस नभएको हुँदा यहाँका विद्यार्थीहरु चितवनको भरतपुर र नवलपुरको गैंडाकोटमा गएर पढ्नुपर्ने बाध्यता रहेको हुँदा देवघाटमै क्याम्पस खोल्नुपर्ने सुझाव सबैले दिएको डा. श्रेष्ठले बताए ।
देवघाटमा कक्षा १२ पास गरेर बसेका विद्यार्थीको संख्या सय भन्दा बढि रहेको र उनीहरुलाई प्रतक्ष्य भेटेर किन थप अध्ययन नगरेको भनेर जिज्ञासा राख्दा पढ्नको लागि बाहिर जानु पर्ने र त्यसकोलागि घरको आर्थिक अवस्था कमजोर भएकोले अध्ययनलाई निरन्तरता दिन नसकेको बताएका थिए । आफ्नै ठाउँमा क्याम्पस भएमा पढाईलाई निरन्तरता दिने उनीहरुको भनाई रहेको डा. श्रेष्ठले बताए ।
क्याम्पस स्थापनाकोलागि तनहुँको देवघाट तथा चितवनको देवघाट र कविलास क्षेत्रका सामुदायिक विद्यालयमा भ्रमण गर्ने क्रममा ति सामुदायिक विद्यालयका विद्यार्थीहरुले पनि देवघाटमा क्याम्पस स्थापना भएमा आफुहरुलाई भविष्यमा अध्ययनलाई निरन्तरता दिन सहज हुने बताएका थिए ।
देवघाटमा क्याम्पस स्थापना गर्ने विषयलाई लिएर अहिले आफुलाइ निन्द्रा पनि नलागेको र हरेक समय यहि विषयलाई नै प्राथमिकता दिएको श्रेष्ठले बताए । आफ्नो अभियानमा देवघाट गाउँपालिका, यहाँका राजनीतिक दल, टोल विकास संस्था, सामाजिक संघ संस्था, सामुदायिक वन समिति लगायतले साथ दिएमा देवघाटमा स्नातक क्याम्पस स्थापना गर्ने आफुहरुको बर्षाैदेखीको चाहाना र सपना चाँडै नै पुरा हुने डा. श्रेष्ठले बताए ।
