देवघाट, असोज १६
देवघाट गाउँपालिकामा विभिन्न क्षेत्रमा हुने बिकृती, अनियमितता, भ्रष्टाचार तथा ढिलासुस्तीको विरुद्ध युवाहरु संगठित हुने भएका छन् । स्थानीय सरकार, राजनीतिक दल, सहकारी, विभिन्न व्यवसाय, सामुदायीक वन लगायतका क्षेत्रमा हुने भ्रष्टाचार, अनियमितता तथा बिकृतीको विरुद्ध युवाहरुले संगठित आवाज उठाउने भएका छन् ।
त्यसकोलागि संयन्त्र निर्माणको लागि आगामी असोज १९ गते देवघाटमा युवाहरुको बृहत भेला आयोजना गरिएको छ । मंगलबार भएको युवाहरुको प्रराम्भिक भेलाले असोज १९ गते वडा नम्बर ५ को सिटि हलमा बृहत युवा भेलाको आयोजना गर्ने निर्णय गरिएको भेलाको संयोजन गर्ने मध्येका शान श्रेष्ठले बताए । उक्त भेलामा २५० भन्दा बढि युवाहरुको सहभागिता रहने श्रेष्ठले बताए ।
उक्त प्राराम्भिक भेलाले नेपाली काँग्रेसका अर्जुन अधिकारी, नेकपा एमालेका शान श्रेष्ठ, राष्ट्रिय स्वतन्त्र पार्टीका बलबहादुर क्षेत्री र नेकपा माओवादी केन्द्रका दुर्गालाल गुरुङलाई युवा भेलाको संयोजन गर्ने जिम्मेबारी दिएको छ । उक्त भेलामा सबै राजनीतिक दलमा आवद्ध युवाहरु तथा राजनीतिक दलमा आवद्ध नभएका युवाहरुलाई संगठित गरि समिति निर्माण गर्ने संयोजनको जिम्मेबारी पाएका अर्जुन अधिकारीले बताए ।
उक्त समितिले गर्ने कामहरुको बारेमा आगामी भेलामा थप निर्णय हुने अधिकारीले बताए ।
