देवघाट, मंसिर १७
सामाजिक विकास कार्यालय तनहुँको आयोजना एवं देवघाट गाउँपालिकाको संयोजनमा लैङ्गिक हिंसा विरुद्धको १६ दिने अभियान अन्तर्गतको सचेतना कार्यक्रम सोमबार देवघाटमा सम्पन्न भयो ।
उक्त कार्यक्रममा बोल्दै देवघाट गाउँपालिकाका अध्यक्ष तिलबहादुर थापाले सबैले हिंसाको विरुद्धमा आवाज उठाउने हो भने जुनसुकै प्रकारका हिंसाको अन्त्य हुने बताए । देवघाट गाउँपालिकाले लैङ्गिक हिंसा अन्त्यकोलागि सबै वडामा सचेतना कार्यक्रम सन्चालन गर्ने अध्यक्ष थापाले बताए ।
सामाजिक विकास कार्यालय तनहुँका प्रमुख बिदुरहरि आचार्यको अध्यक्षतामा भएको उक्त कार्यक्रममा इलाका प्रहरी कार्यालय देवघाटका प्रमुख प्रहरी नायव निरिक्षक सुजन गुरुङ, अधिवक्ता सरिता भण्डारी, महिला अधिकारकर्मी सारदा गैह्रे लगायतले लैङ्गिक हिंसा र कानुनी प्रावधानहरुको बारेमा सहजिकरण गरेका थिए ।
उक्त कार्यक्रममा देवघाट गाउँपालिकाका उपाध्यक्ष भुवनसिंह गुरुङ, वडा नम्बर ५ का अध्यक्ष एवं गाउँपालिकाका प्रवक्ता पुर्णबहादुर कुँवर, निमित्त प्रमुख प्रशासकीय अधिकृत गोविन्दप्रसाद पौडेल, युवा खेलकुँद तथा शिक्षा शाखाका प्रमुख होमनाथ लामिछाने, सामाजिक विकास कार्यालयका लेखा अधिकृत कृष्ण न्यौपाने लगायतले मन्तव्य राखेका थिए ।
सो कार्यक्रममा देवघाट गाउँपालिका वडा नम्बर ५ का विभिन्न महिला समुहका करिब ४ सय जनाको सहभागिता रहेको थियो ।
