देवघाट, मंसिर ३०
हरेक वर्ष धान्य पुर्णिमाको दिन विशेष पुजा हुने देवघाट गाउँपालिका–५ पिपलटार स्थित भर्जन कालिका मन्दिरमा आइतबार विशेष पुजा सम्पन्न भएको छ । उक्त मन्दिरमा वि.स.२००६ साल देखी हरेक वर्ष धान्य पुर्णिमाको दिन विशेष पुजा गर्ने गरिदै आएको मन्दिर निर्माण समितिका अध्यक्ष केशवचन्द्र न्यौपानेले बताए ।
धेरै पुरानो मन्दिर भएपनि निकै जिर्ण अवस्थाको उक्त मन्दिर हाल पुननिर्माणको क्रममा रहेको छ । देवघाटका प्राय संरचनाहरु पक्की र व्यवस्थित हुँदै गएपनि निकै पुरानो यस मन्दिर जिर्ण अवस्थामा रहेको हुँदा स्थानीय बासिन्दा र संघ संस्थाको सहयोगमा पक्की संरचना निर्माण गरिएको अध्यक्ष न्यौपानेले बताए ।
न्यौपानेका अनुसार गत आर्थिक वर्षको लेखापरिक्षण अनुसार मन्दिर निर्माणकोलागि २१ लाख खर्च भएको र अझै करिब ४० लाख खर्च हुने अनुमान गरिएको छ । जस मध्ये अधिकांश रकम देवघाटका सामुदायिक वन, संघ संस्था र दाताहरुबाट संकलन गरिएको छ । उक्त मन्दिर देवघाटको पुरानो र ऐतिहाँसिक मन्दिर रहेको हुँदा मन्दिरको निर्माण पश्चात धार्मिक पर्यटक भित्र्याउन सकिने भन्दै न्यौपानेले मन्दिर निर्माणकोलागि सहयोग गर्न अनुरोध गरेका छन् ।
उक्त कार्यक्रममा बोल्दै देवघाट गाउँपालिकाका अध्यक्ष तिलबहादुर थापाले यस मन्दिर प्रति धेरै जनाको आशा र विश्वास रहेको हुँदा मन्दिर निर्माण कार्यकोलागि गाउँपालिकाबाट आवश्यक बजेट बिनियोजन गर्ने बताए । आफ्नै कार्यकालमा मन्दिर निर्माण गरिसक्न आवश्यक रकम बिनियोजन गर्ने अध्यक्ष थापाले प्रतिबद्धता जनाए ।
उक्त अवसरमा पन्चेवाजाद्वारा अतिथी र भक्तजनलाई स्वागत गरिएको थियो । सो अवसरमा मन्दिर परिसरमा आयोजित खेल मैदानमा विभिन्न खेलकुँदका कार्यक्रमहरु समेत गरिएको थियो । भर्जन कालिका युवा क्लवको आयोजनामा भएको सेभेन ए साईड फुटबल प्रतियोगितामा आयोजकको दुबै टिम क्रमशः ए र बी नै प्रथम र दोश्रो भएका छन् । आयोजक ए ले आयोजक बी लाई २–० गोल अन्तरले पराजित गरेको थियो । फुटवल प्रतियोगितामा १३ टिमको सहभागिता रहेको थियो ।
त्यस्तै मधुवन र रानीवन सामुदायिक वनको सहभागिता रहेको महिला र पुरुष तर्फको डोरी तान्ने प्रतियोगितामा दुबै समुहमा रानीवन सामुदायिक वन समुह प्रथम भए । त्यस्तै घैटो फुटाइ प्रतियोगितामा मा श्रीधर न्यौपाने प्रथम भएका थिए भने हाँस समाउने खेलमा गिता मगरले हास समाएर प्रथम भएकी थिइन् । त्यस्तै छेलो फाल्ने खेलमा खुम बहादुर गुरुङ प्रथम भएका थिए ।
