देवघाट, पुस १३
देवघाट गाउँपालिका स्तरीय राष्ट्रपति रनिङ सिल्ड प्रतियोगितामा वडा नम्बर २ स्थित आदर्श शिक्षा मावि प्रथम, वडा नम्बर ५ स्थित कालिका मावि द्वित्तिय र वडा नम्बर ५ स्थित बज्रयोगिती मावि तृतिय भएका छन् ।
प्रतियोगितामा आदर्श शिक्षा माविले ८ स्वर्ण, ५ रजत र ३ कास्य सहित कुल १६ पदक प्राप्त गरेको थियो । यस्तै कालिका माविले ६ स्वर्ण, ४ रजत र ७ कास्य सहित कुल १७ पदक प्राप्त गरेको थियो । त्यसैगरि बज्रयोगिनी माविले ४ स्वर्ण, ५ रजत र ३ कास्य पदक पाएका थिए ।
त्यसैगरि प्रतियोगितामा सहभागी अन्य विद्यालयहरु मध्ये भृकुटी मावि सराङघाटले २ स्वर्ण, १ रजत र ५ कास्य सहित ८ पदक, पार्वती मावि कोटाले १ स्वर्ण, ३ रजत र ४ कास्य सहित ८ पदक, ले कालिगंगा मावि बैदीले १ स्वर्ण, बालकेश मावि छिपिछिपेले २ रजत, सिद्धमहाकाली मावि देवघाटले १ रजत र २ काँस्य सहित ३ पदक र राष्ट्रिय मावि काफलडाँडाले १ रजत पदक प्राप्त गरेको देवघाट गाउँपालिकाका शिक्षा तथा खेलकुँद शाखाका प्रमुख होमनाथ लामिछानेले जानकारी दिए । यसैगरि भलिवल तर्फ पुरुष भलिवलमा आदर्श शिक्षा माबि प्रथम र महिला भलिवलमा बज्रयोगिनी मावि प्रथम भएका थिए ।
वडा नम्बर ५ स्थित कालिका माविको खेलमैदानमा गत विहिबारदेखी आयोजित उक्त प्रतियोगिताको देवघाट गाउँपालिकाका अध्यक्ष तिलबहादुर थापाले उद्घाटन गरेका थिए ।
उक्त प्रतियोगिताको समापन एवं पुरस्कार वितरण कार्यक्रम शनिबार सम्पन्न भयो । उक्त कार्यक्रममा देवघाट गाउँपालिका अध्यक्ष तिल बहादुर थापा, गाउपालिका प्रशासकिय प्रमुख दिनेश सारु, शिक्षा तथा खेलकुँद शाखाका प्रमुख होमनाथ लामिछानेले मन्तव्य राखेका थिए ।
कालिका मावि व्यवस्थापन समितिका अध्यक्ष डा.सुरेन्द्रप्रसाद श्रेष्ठको अध्यक्षतामा आयोजित सो कार्यक्रममको सन्चालन शिक्षक युवराज साँखीले गरेका थिए ।
