दमौली, माघ १४
बुद्धसिंह मार्गमा पर्ने घुमाउनेको पुल लगायत अन्य पाँच वटा पुलको निर्माण कार्यलाई गति दिन माग गर्दै तनहुँको व्यासको १३ र १४, बन्दिपुर, आबुँखैरेनी र देवघाट गाउँपालिकाका बासिन्दाहरुले सोमबार दमौलीमा बृहत प्रर्दशन गरेका छन् । पुलका सरोकारवाला बासिन्दाहरुले दमौलीमा प्रर्दशन गर्दै बुद्धसिंह मार्गको विभिन्न स्थानमा बन्दै गरेको वा बन्ने प्रक्रियामा रहेको पाँच वटा मोटरेवल पुलको निर्माण कार्यलाई गति दिन माग गरेका छन् ।
व्यास ३ को देउराली नगरबाट सयौंको संख्यामा ¥याली निकालेका उनीहरुले जिल्ला प्रशासन कार्यालय, पुर्वाधार विकास कार्यालय र सडक डिभिजन कार्यालय अगाडी प्रर्दशन गरेका थिए । स्थानीय बासिन्दाहरुले घुमाउनेको पुल कहिले बन्छ भन्दै प्रमुख जिल्ला अधिकारी सहित पुर्वाधार विकास कार्यालय र सडक डिभिजन कार्यालयका प्रमुखलाई प्रश्न गर्दै नारावाजी समेत गरेका थिए ।
बुद्धसिंह मार्गमा रहेको घुमाउने लगाउतका स्थानका नदी तथा खोलामा पुल निर्माणकोलागि दवाव दिन स्थानीय स्तरबाट गठित संघर्ष समितिका संयोजक सिद्धान्त गर्जा मगरले राज्यको उदासिनता र ठेकेदारको लापरवाहीको कारण घुमाउनेमा निर्माणाधिन पुल ११ वर्षदेखी अलपत्र रहेको बताए । उनले घुमाउने पुल सहित सुँढेखोला पुल, ढाँडखोला पुल, खानी खोला पुल, बगर खोला पुल र भुतखोला पुलको निर्माणमा भएको ढिलासुस्ती अब अन्त्य नभए यो भन्दा ठुलो प्रर्दशन गर्ने चेतावनी दिए ।
संघर्ष समितिका संयोजक गर्जा मगरले ग्रामिण क्षेत्रका सर्वसाधण जनतालाई जे गरेपनि हुन्छ भन्ने मानसिकताले निर्माण कार्यमा ढिलाइ भईरहेको आरोप लगाए । उनले जनजातिहरुको बस्ती रहेको स्थानमा विकास निर्माणको काममा ढिलाई भईरहेको बताए । तनहुँ जिल्लाको यस विकट भेगबाट ठूलाठूला ओहोदाका नेताहरू पाए तर जनताले प्रत्यक्ष अनुभूति हुने गरी विकास अहिलेसम्म पाउन उनले नसकेको गर्जा मगरको भनाई थियो ।
बुद्धसिंह मार्ग उपभोक्ता समितिका पुर्व अध्यक्ष विश्व बास्तोलाले घुमाउनेको पुल निर्माणमा भएको ढिलाईले राज्यको अवस्था चित्रण गर्ने बताए । उनले सरकारमा रहेकाहरु गम्भिर नहुँदा पुल निर्माण पक्षले वास्ता नगरेको आरोप लगाए । उक्त पुलको निर्माण कार्यलाई अव गति दिनु पर्ने भन्दै बास्तोलाले स्थानीय बासिन्दाहरुको विकासको अधिकारलाई कुण्ठित गर्न नपाइने बताए । केही दिन अघि संघर्ष समितिको नेतृत्वमा स्थानीय बासिन्दाहरुले घुमाउनेमा प्रर्दशन समेत गरेका थिए ।
मृत सञ्जीवनी निर्माण कम्पनी हेटौंडाले पहिलो पटक २०७० असारमा पुल निर्माणका लागि सम्झौता गरेको थियो । बारम्बारको म्याद थप र डिजाइन परिवर्तन पछि अन्तिम पटक २०७५ माघमा निर्माणका लागि पुनः सम्झौता गरेकामा २०७८ चैतमा पुल निर्माण सकिनुपर्नेमा अहिलेसम्म जम्मा ३० प्रतिशत मात्र काम भएको छ ।
त्रिशूली नदीमाथि स्टिल ट्रसको पुल बनाउने सम्झौता भए पनि पछि डिजाइन परिवर्तन गरी आर्कब्रिज बनाउन लागिएको हो । अहिले सम्म त्रिशुलीको वारिपारीका फाउन्डेसन मात्र बनेका छन् । अरु काम हुनै सकेको छैन ।
पुलको चितवनको तर्फको पिल्लर र सडकका कारणले नारायणगढ मुग्लिन सडकखण्ड भासिन सक्ने भन्दै सडक आयोजनाले डिजाइनसहितको सुरक्षा प्रत्याभूतिको ग्यारेन्टी माग गर्दा काममा ढिलाइ भएको ठेकेदार कम्पनीको दावी छ । ठेकेदार कम्पनीले १० प्रतिशत पेश्कीसमेत लगिसकेको छ । पुल १ सय ५ मिटर लम्बाइ र फुटपाथसहित ११ मिटर चौडाइ रहने छ । आधुनिक ‘आर्क’ डिजाइनमा बन्ने पुलको लागत ९ करोड ५६ लाख रुपैयाँ छ । दोहोरो लेनको पुलमा ७.५ मिटर गाडी हिँड्ने भाग रहने डिजाइनमा उल्लेख छ ।
यस अघि सडक डिभिजन दमौलीले उक्त पुलको ठेक्का तोड्ने प्रक्रिया सुरु गरेपनि उक्त प्रक्रिया त्यसै तुहिएको थियो । कार्यालयले २०८० पुस ९ गते सुचना प्रकाशन गरि ठेक्का तोड्ने बारेमा चेतावनी दिएपनि पछि उक्त प्रक्रिया त्यसै तुहिएको थियो ।
गण्डकी प्रदेशलाई चितवनको नारायणगढसम्म जोड्ने सबैभन्दा छोटो दूरीको बुद्धसिंमार्गको घुमाउनेको उक्त मोटरेबल पुलको निर्माण सम्पन्न पश्चात पोखरा र दमौलीलाई नारायणगढ आउन जान हाल सञ्चालन भइरहेको मुग्लिङ–नारायणगढ सडकभन्दा २३ किलोमिटरको दूरी छोटो पर्छ । घुमाउनेमा मोटरेबल पुल नहुँदा यातायातका साधन तनहुँकै सिमानामा पुगेर फर्कन बाध्य छन् । मोटरसाइकल भने डोहोर्याएर मुग्लिङ–नारायणगढ सडक खण्डसम्म ल्याउन सकिन्छ ।
