विष्णु मगर । देवघाट, चैत १६
त्रिशुली नदीमा गत असोजमा आएको बाढीले क्षती पुगेको भरतपुर महानपा–२९ र तनहुँको देवघाट गाउँपालिका–५ बगन्दी जोड्ने झोलुङ्गे पुलको अझै मर्मत भएको छैन । बाढिले उक्त पुलको दुवै तर्फको लठ्ठा चुडाएको छ । जसको कारण सर्वसाधरण निकै जोखिमपुर्ण यात्रा गर्न बाध्य भएका छन् ।
देवघाट गाउँपालिका वडा नम्बर ५ की वडा सदस्य कमला गुरुङले उक्त पुलको बारेमा देवघाट गाउँपालिका र भरतपुर महानगरपालिकामा जानकारी गराएपनि हालसम्म मर्मत नभएको बताइन् । सो पुल दुवै तर्फको लठ्ठा चुडिएपछि बिच भागमा पुरै छड्के भएको र मान्छेहरु हिड्दा निकै हल्लिने वडा सदस्य गुरुङले बताइन् ।
सो पुलको लठ्ठा बाटनै बगन्दी खानेपानको पाइप लगिएको हुँदा पुलमा झन भार परेको उनले बताइन् । पानीको पाइपलाई बैकिल्पक माध्यमबाट लैजान अनुरोध गरिएपनि सुनुवाई नभएको उनले बताइन् । उक्त पुल कुनैपनि समयमा चुडिन सक्ने खतरा रहेको भन्दै गुरुङले उक्त पुललाई जतिसक्दो चाँडो मर्मत नगरिए कुनैपनि बेला ठुलो दुर्घटना हुनसक्ने बताइन् ।
