तनहुँ । साउन ५
नेपाली काँग्रेसका संस्थापक तथा नेपालका प्रथम जननिर्वाचित प्रधानमन्त्री विश्वेश्वरप्रसाद कोइरालाको ४३ औं स्मृति दिवस मंगलबार विभिन्न कार्यक्रम गरि मनाइँदै छ ।
नेपालमा प्रजातन्त्रको स्थापनाका लागि आजीवन संघर्ष गरेका नेता कोइरालाको वि.स. २०३९ साल साउन ६ गते निधन भएको थियो । प्रत्येक वर्षको साउन ६ गतेलाई विपी स्मृति दिवसका रूपमा विभिन्न कार्यक्रम गरेर मनाउने प्रचलन छ ।
वि.सं. २००५ सालमा बनारस, २००९ सालमा जनकपुर र २०१७ सालमा काठमाडौंमा भएका काँग्रेसको महाधिवेशनमा उनले उक्त पार्टीको सभापतिको जिम्मेवारी प्राप्त गरेका थिए । २०१५ सालमा बहुदलीय व्यवस्थामा आधारित संसदको निर्वाचनमा विराटनगरबाट विजयी बनेका विपी २०१६ साल असार १६ गतेदेखि २०१७ साल पौष १ गतेसम्म नेपालको प्रथम जननिर्वाचित प्रधानमन्त्री बनेका थिए ।
राजनीतिका साथै साहित्यका क्षेत्रमा समेत महत्वपूर्ण योगदान पु¥याएका कोइरालाका तीन घुम्ती (२०२५), नरेन्द्र दाइ (२०२६), सुम्निमा (२०२७), मोदीआइन (२०३६), हिटलर र यहुदी (२०४०), बाबु,आमा र छोरा (२०४५), उपन्यास एवम् कथातर्फ–मेरो कथा (२०४०), दोषी चश्मा (२०३९) र श्वेत भैरवी (२०३९) प्रकाशित छन् । उनका साहित्यिक कृतिहरू विशेषतः यौन मनोविज्ञानमा आधारित छन् ।
विपी स्मृति दिवसको अवसरमा मंगलबार नेपाली काँग्रेस तनहुँले रक्तदान तथा खुल्ला कविता वाचन प्रतियोगिता आयोजना गरेको छ । रक्तदान कार्यक्रम विहान ७ बजे र कविता प्रतियोगिता विहान ११ बजे नेपाली काँग्रेस जिल्ला कार्य समितिको कार्यालय विपी स्मृति भवन व्यास नपा ३ मा हुने नेपाली काँग्रेस तनहुँका सचिव लक्ष्मीभक्त खनालले जानकारी दिए । यस्तै विहान रक्तदान अघि व्यास नपा ३ स्थित दमौली सभागृहको आडैमा रहेको विपी कोईरालाको शालिकमा माल्यार्पण कार्यक्रम राखिएको छ ।
