तनहुँ । साउन ११
नेकपा एमाले भानु नगर कमिटिले आइतबार संघीय मामिला तथा सामान्य प्रशासन मन्त्री भगवती न्यौपानेलाई स्वागत गरेको छ । नगर कमिटिको कार्यालय भानु नपा–१ भन्सारमा नगर कमिटिले भव्य कार्यक्रम आयोजना गरि मन्त्री न्यौपानेलाई स्वागत गरेको हो । उक्त कार्यक्रममा सयौंको संख्यामा एमालेका नेता तथा कार्यकर्ताहरुको सहभागिता रहेको थियो ।
उक्त कार्यक्रममा बोल्दै नेकपा एमालेको केन्द्रीय सदस्य समेत रहेकी मन्त्री न्यौपानेले जनताका समस्याहरुको विषयमा आफु गम्भीर रहेको बताइन् । आफू भानु नगरपालिकाको छोरी भएको कारण भानु नगरबासी र जनताको शिर निहुर्याउने गतिविधिहरु कहिल्यै नगर्ने न्यौपानेले बताइन् ।
पछिल्लो समयमा नेकपा एमाले सरकारमा आएपछि विकासको गतिविधिहरु रफ्तारले अगाडि बढेको भन्दै न्यौपानेले विकासको काम नेकपा एमाले बाहेक अरुले गर्न नसक्ने बताइन् । आफू मन्त्री भइरहँदा तनहुँको समस्यालाई उजागर गरि आफ्नो कार्यकालमा धेरै विकासको गतिबिधि गरि कमि कमजोरि नआउने गरि काम गर्ने न्यौपानेले बताइन् । नेकपा एमालेको नेतृत्वमा अव तनहुँमा परिवर्तनको काम गरिने मन्त्री न्यौपानेले बताइन् ।
सो कार्यक्रममा नेकपा एमालेका जिल्ला अध्यक्ष हरिराज कडेंलले पार्टी भित्रका सामान्य अन्तरविरोधलाई ठुलो रुपमा नलिई पार्टीको काममा लाग्नुपर्ने बताए । जिवन्त पार्टीमा साना ठुला समस्या र अन्तरविरोधहरु सामान्य भएको भन्दै कडेंलले त्यसलाई पार्टीले नै समाधान गर्ने बताए ।
उक्त कार्यक्रममा नेकपा एमाले भानु नगर कमिटिका अध्यक्ष शंकर रानाभाटले अव पार्टीको लक्ष्यको रुपमा रहेको मिसन ८४ भानु नगरपालिकामा सफल पार्ने बताए । उनले तनहुँ क्षेत्र नम्बर १ ले पहिलो पटक एमालेको मन्त्री पाएको हुँदा यसपटक जसरी पनि सफल हुनै पर्ने बताए ।
