तनहुँ । भदौ ११
बन्दीपुर केबुलकार एण्ड टुरिजम लिमिटेडले बुधबारदेखी आम सर्वसाधारणका लागि आईपीओ बिक्री खुला गरेको छ ।
कम्पनीको जारी पूँजी २ अर्ब ८३ करोडमध्ये २०.७० प्रतिशत अर्थात् ५८ लाख ६० हजार कित्ता शेयर सर्वसाधारण समूहमा छुट्याइएको हो । आयोजना प्रभावित, वैदेशिक रोजगारमा रहेका, कर्मचारी तथा सामूहिक लगानी कोषलाई छुट्याएपछि बाँकी ४३ लाख ४१ हजार ८० कित्ता शेयर आम लगानीकर्ताले आवेदन दिन सक्नेछन् ।
नेपाल एसबीआई मर्चेन्ट बैंकिङका अनुसार, भदौ १५ गतेसम्म आवेदन दिन सकिनेछ । लगानीकर्ताले न्यूनतम १० कित्ता र अधिकतम २० हजार कित्तासम्मका लागि आवेदन दिन पाउने व्यवस्था गरिएको छ । आवेदन मेरोसेयर अनलाइन प्रणाली वा सीआस्बा सदस्य बैंक तथा वित्तीय संस्थामार्फत गर्न सकिनेछ ।
कम्पनीको मुख्य व्यवसाय केबुलकार तथा होटल सेवा रहेको छ । बन्दीपुरमा रहेको केबुलकार गत वर्ष जेठ ३१ गतेदेखि सञ्चालनमा आएको हो भने होटल क्वीन टावर आगामी मंसिरदेखि सञ्चालनमा आउने अनुमान गरिएको छ । साथै, कम्पनीले ड्राइभ–इन रेस्टुरेन्ट, मनोरञ्जनात्मक बगैँचा, जिप–लाइन र स्काई–साइक्लिङ सेवा पनि सञ्चालनमा ल्याएको छ ।
केयर रेटिङ नेपालले कम्पनीलाई ‘बीबी’ रेटिङ प्रदान गरेको छ, जसले कम्पनीको दायित्व वहन क्षमतालाई मध्यम स्तरमा रहेको देखाउँछ । कम्पनीको दर्ता कार्यालय काठमाडौंको कालीमाटीमा रहेको छ ।
