काठमाडौं । कार्तिक १५
नेकपा माओवादी केन्द्रले माधवकुमार नेपाल नेतृत्वको नेकपा एस तथा नेत्रविक्रम चन्द विप्लव समूहबाट अलग्गिएको चिरण पुन समूहसँग पार्टी एकता गर्ने निर्णय गरेको छ ।
शनिबार बसेको माओवादी महाधिवेशन आयोजक समितिको बैठकले नेकपा एस लगायतसँगको एकताका लागि प्राविधिक र संगठनात्मक विषय टुंग्याएको हो ।
प्रवक्ता अग्नि सापकोटाले नेकपा एस लगायतसँग एकता गर्ने निर्णय भएको र त्यसैको अनुमोदनका लागि कात्तिक १७ गते केन्द्रीय समिति बैठक बोलाइएको जानकारी दिए ।
‘एकता ढिलो गर्दा राष्ट्रिय राजनीतिमा पहलकदमी कम हुने भएकाले तत्काल पार्टी एकता गर्ने निर्णय भएको छ । १७ गते बैठकबाट एकता टुंगो लाग्छ’, उनले भने ।
नेकपा एसको केन्द्रीय कमिटी बैठकले माओवादी केन्द्रसँग एकता गर्ने निर्णय गरिसकेको छ ।
एससँग पार्टी एकता गर्ने निर्णयप्रति जनार्दन शर्माले फरक मत राखेका छन् । जनार्दनले अराजकता देखाएको आरोप सापकोटाले लगाए ।
‘उहाँले केही लेखेर दिनुभएको छ । अध्यक्ष प्रचण्डले उहाँ (जनार्दन) लाई तपाईं बस्नुस्, छलफल गर्नुस् भन्नुभयो । तर उहाँको कुरा जनवादी छैन, उहाँको तरिका अराजक छ’ सापकोटाले भने ।
