तनहुँ । पुस ७
नेपाल आदिवासी जनजाती महासंघ जिल्ला समन्वय परिषद तनहुँको आयोजनामा छैठौं आदिवासी जनजाती सांस्कृतिक तथा पर्यटन महोत्सव यही पुस २४ गतेदेखी हुने भएको छ । व्यास नपा–३ अनसन चौतारी स्थित खुला चौरमा आयोजना हुने उक्त महोत्सव माघ ५ गतेदेखी सम्म आयोजना हुनेछ ।
यस अघि व्यास नपा–३ विपि वनबाटिका स्थित खुला मैदानमा महोत्सव हुने भनिएपनि उक्त खेलमैदानको संरक्षणको लागि युवाहरुले खेलमैदानमा महोत्सव गर्न नदिन व्यास नगरपालिका समक्ष अनुरोध गरेपछि नगरपालिकाले उक्त मैदानको सट्टा अनसन चौतारी स्थित खुला चौरमा महोत्सव आयोजना गर्न लागिएको हो ।
महोत्सवबारे जानकारी दिन सोमबार महासंघको कार्यालयमा आयोजित पत्रकार सम्मेलनमा महोत्सव अनसन चौतारी स्थित खुला चौरमा आयोजना गर्ने निर्णय भएको महासंघ तनहुँका बरिष्ठ उपाध्यक्ष सिद्धान्त थापा मगरले बताए ।
उक्त महोत्सवमा ७३ लाख आम्दानी हुने तथा ५८ लाख खर्च भई १५ लाख रुपैयाँ बचत हुने अपेक्षा राखिएको थापाले बताए । उक्त बचत रकमले व्यास नपा १२ मा जग्गा खरिद गरि जनजाती संग्रहालय निर्माण गर्ने थापाले बताए । अनसन चौतारीको चौरमा स्थान साँघुरो हुने भएको कारण यसपटकको महोत्सवमा १५० स्टल राखिने भएको छ ।
नेपाल आदिवासी जनजाती महासंघले २०६२ सालमादेखी दमौलीमा आदिवासी जनजाती सांस्कृतिक महोत्सव सुरु गरेको थियो ।
