तनहुँ । पुस २०
राष्ट्रिय प्रजातन्त्र पार्टी (राप्रपा) तनहुँको नवौं जिल्ला अधिवेशन आइतबार दमौलीमा सम्पन्न भयो । उक्त अधिवेशबाट इमबहादुर केसी अध्यक्षमा निर्विरोध निर्वाचित भए । अध्यक्षका लागि निवर्तमान अध्यक्ष विनोद घर्ति र केसीले उम्मेदवारी दर्ता गराएकोमा घर्तिले उम्मेदवारी फिर्ता लिएपछि केसी निर्विरोध निर्वाचित भएका हुन् ।
अध्यक्षमा निर्वाचित केसीले पार्टीको नेता तथा कार्यकर्ताको भावना अनुरुप काम गर्ने प्रतिवद्धता जाहेर गरेका छन् । उनले गाउँ गाउँ डुलेर पार्टीको संगठन बलियो बनाउने र राप्रपालाई बलियो बैकल्पिक शक्ति बनाउने बताए ।
निवर्तमान अध्यक्ष बिनोद घर्तीको अध्यक्षतामा भएको उक्त अधिवेशनको राप्रपाका उपाध्यक्ष हेमजङ गुरुङले उद्घाटन गरेका थिए । अधिवेशन उद्घाटन गर्दै उपाध्यक्ष गुरुङले आफ्ना अपराध लुकाउन र जेल जानबाट बच्नका लागि काँग्रेस र एमाले चुनावमा मिलेर जाने तयारीमा रहेको बताए । अव जनताले यस्ता शक्तिहरूलाई चिन्नुपर्ने बेला आएको उनको भनाई थियो ।
