तनहुँ । माघ १०
आगामी फागुन २१ गते हुने प्रतिनिधि सभा निर्वाचनकोलागि तनहुँमा आवश्यक पर्ने निर्वाचन प्रहरीको माग अनुसारको संख्या नपुगेपछि तेश्रो पटक भर्ना खुलाईएको छ । तनहुँमा नेपाल प्रहरी अन्तर्गत १५७२ जना निर्वाचन प्रहरी भर्ना गर्न लागिएपनि यसअघि दुईपटक खुलाईएको भर्नामा आवदेन दिएका १२३६ जना मध्ये १२१६ जनाले मात्रै लिखित परिक्षा उत्तिर्ण गरेका थिए ।
शुक्रबार भएको लिखित परिक्षामा १२१६ जना उत्तिर्ण भएपछि थप ३६५ जनाकोलागि तेश्रो पटक भर्ना खुलाईएको छ । जिल्ला प्रहरी कार्यालयले शुक्रबार सुचना प्रकाशन गरि माघ १० गते शनिबार र ११ गते आइतबार दुई दिन थप आवेदन दिन पाईने जनाएको छ ।
जिल्ला प्रहरी कार्यालय बाहेक सशस्त्र प्रहरी गण भानु, इलाका प्रहरी कार्यालय आबुँखैरेनी, बन्दीपुर, भानु नारेश्वरटार र खैरेनी बेलचौतारामा समेत आवेदन दिन पाईने सुचनामा जनाईएको छ । त्यसैगरि यस अघि आवेदन दिएका मध्ये लिखित शुक्रबार भएको लिखित परिक्षामा सहभागी हुन नसकेकाहरुले पनि १२ गते विहान हुने परिक्षामा सहभागी हुन सक्ने जिल्ला प्रहरी कार्यालयले जनाएको छ ।
निर्वाचन प्रहरीमा भर्ना हुनकोलागि १८ वर्ष पुरा भई ५४ वर्ष ननाघेको हुनुपर्नेछ । त्यसबाहेक साधारण लेखपढ गर्न जान्ने, कुनै राजनीतिक दलमा आवद्ध नभएको, कुनै फौजदारी अभियोगमा अदालतबाट सजाय नपाएको तथा कुनै आतंकबादी तथा बिध्वंसात्मक संगठनको सदस्य नभएको हुनुपर्ने छ ।
निर्वाचन प्रहरीको कार्यअवधि ४० दिनको हुनेछ । निर्वाचन प्रहरीको रुपमा सेवा गरेवापत ४० दिनको एकमुष्ठ ३४ हजार ७७६ तथा नेपाल प्रहरी तथा सशस्त्र प्रहरीले प्राप्त गर्ने अनुसारको खाद्यान्न वापतको रकम पनि प्राप्त गर्नेछन् ।
