देवघाट । माघ १४
पवित्र धार्मिक स्थल देवघाटधाममा यही माघ १९ गतेदेखी २९ गतेसम्म शतचण्डी महायज्ञ एवं देवघाट माघ–महोत्सव आयोजना हुने भएको छ । देवघाट गाउँपालिका–५ टाउनचोकमा रहेको राम राम मन्दीरको आयोजना तथा भागवत बाचक आचार्य शीतल कृष्णको संकल्पमा उक्त देवघाट माघ–महोत्सव तथा शतचण्डी महायज्ञ हुने भएको हो ।
ऋषिमुनीहरुको तपोभुमीको रुपमा लिइने तथा पवित्र त्रिशुली र कालीगन्डकीको संमगमा माघ महिनामा स्नान गर्नाले ठुलो पुण्य प्राप्त हुने विश्वास छ । सोही अनुसार देवघाटमा मकर स्नान गर्न भक्तजनलाई निमन्त्रणा गर्न माघ १९ देखी २९ गतेसम्म १० दिन उक्त देवघाट माघ–महोत्सव तथा शतचण्डी महायज्ञ आयोजना गरिएको हो ।
दुर्गा पान्चायन मन्दिरको रुपमा चिनिने राम राम मन्दीरमा ४० वर्ष देखी अखण्ड रुपमा बलीरहेको धुनीमा महायज्ञको अवसरमा आफ्नै घरबाट लगेको चरु हवन गर्न पाइने महायज्ञका संकल्पकर्ता आचार्य शीतल कृष्णले बताए । महायज्ञ सन्चालनकोलागि चितवन तर्फ त्रिशुलीको किनारमा ठुलो पाण्डाल निर्माण गरिएको छ । चरु हवन भने तनहुँ तर्फ रहेको राम राम मन्दिरमा हुनेछ ।
राम राम मन्दिरको जिर्णोद्वारको लागि आयोजित उक्त महायज्ञमा विश्व विख्यात भातवत कथा बाचिका देवी प्रतिभा सहित शीतलकृष्ण महाराजले कथा वाचन गर्नेछन् । उक्त कार्यक्रमको तयारी तिव्र पारिएको आयोजकले जनाएको छ । उक्त धार्मिक अनुष्ठान मार्फत राष्ट्रको शान्ति तथा समाजको समृद्धि र मानव कल्याणको कामना गरिने छ ।
उक्त माघ–महोत्सवमा देशका विभिन्न स्थानबाट श्रद्धालु भक्तजनको सहभागिता रहने अपेक्षा गरिएको छ । कार्यक्रमलाई सभ्य, सुरक्षित र मर्यादित रुपमा सम्पन्न गर्न सबै तयारी भईरहेको आयोजक पक्षले जनाएको छ । माघ महिनाको पवित्र अवसरमा आयोजना हुने यस धार्मिक पुण्य लाभ लिन सबै श्रद्धालु भक्तजनहरुमा आयोजक पक्षले आग्रह गरेको छ ।
