तनहुँ । माघ १८
तनहुँ क्षेत्र नम्बर १ का नेपाली काँग्रेसका उम्मेदवार गोविन्द भट्टराईले देशको नीति निर्माण गर्ने स्थानमा तनहुँको आवाज प्रतिनिधित्व गर्ने प्रतिबद्धता जनाएका छन् । चुनावी अभियानको क्रममा आईतबार व्यास नपा ११ को विभिन्न स्थानमा पुगेका भट्टराईले देशको नीति निर्माण गर्ने स्थानमा तनहुँको आवाज प्रतिनिधित्व गर्ने भन्दै यसपटक रुख चिन्हमा मतदान गरेर जनताको आवाज सुनिने कुरालाई सुनिश्चित गर्नुहुने विश्वास लिएको बताए ।
‘हामी तनहुँ निर्माणको एउटा विशिष्ट संघारमा छौँ । नेपाली कांग्रेसमा जुन बदलाव देखिएको छ, हामीले अब देश रुपान्तरणको साझा संकल्प लिएका छौँ ।’ भट्टराईले भने ‘त्यो रुपान्तरण भनेको अब तनहुँ पनि बदलिनेछ भन्ने हो, हामीले तनहुँलाई पूर्णरुपमा सम्मुनत बनाउनु पर्ने छ ।’ भट्टराईले भने ‘यहाँको माटोमा जन्मिएर, यही माटोमा खेल्दै हुर्किएको मैले यो माटोलाई बुझेको छु । यो माटोलाई थप उर्वर बनाउन म समर्पित पनि हुनेछु ।’
तनहुँ र तनहुँ क्षेत्र नम्बर १ का बुबाआमा, दिदीबहिनी, दाजुभाइ तथा बाबुनानीहरुको मुहारमा हाँसो ल्याउनु, यहाँका व्यावसायी मित्रहरुलाई व्यावसायिक वातावरण बनाउन सहयोग गर्नु, यहाँको शिक्षा र स्वास्थ्यामा व्यापक सुधार गरेर सबैको पहुँचमा पुर्याउनु, बेरोजगारी अन्त्य गर्नु आफ्नो उद्देश्य रहेको भट्टराईले बताए । साथै तनहुँलाई पर्यटकीय गन्तव्य बनाएर यहाँका पूर्वाधारमा सुधार गरेर यसको अर्थतन्त्रलाई कायापलट गर्न सकिने भन्दै उनले आफु त्यसमा सदैव लाग्ने बताए ।
